Partia Demokratike ka reaguar pas rastit të transmetuar në emisionin “Stop” në Tv Klan ku një nëpunëse në Drejtorinë e Përgjithshme të Tatimeve është ngacmuar seksualisht dhe dhunuar nga kolegu i saj 60-vjeçar. Orinda Malltezi, anëtare në Departamentin e Çështjeve Sociale në PD, deklaroi këtë të premte se selia blu dënon aktin e padenjë ndaj zonjës dhe mosreagimin e institucioneve.
“Administratës së Edi Ramës nuk i mjafton korrupsioni financiar pa i shtuar edhe atë erotik. Një punonjëse e Drejtorisë së Përgjithshme të Tatimeve është ngacmuar seksualisht në vendin e punës, sipas video-dëshmisë së transmetuar nga emisioni “Stop”. Partia Demokratike dënon fillimisht aktin e padenjë ndaj një zonje, dhe së dyti reagimin, më saktë mosreagimin, institucional ndaj këtij akti, duke i cilësuar të dyja tregues të korrupsionit moral dhe shpirtëror të kësaj administrate, të cilën asnjë skandal nuk e ndal dhe asnjë kod nuk e përmban. Sipas videos, ngacmimi seksual vazhdonte prej kohësh, dhe shprehej fizikisht, verbalisht dhe joverbalisht. Në kushtet e mungesës së politikave të qarta për ngacmimin seksual në vendin e punës, punonjësja ishte munduar ta zgjidhte situatën në mënyrë të heshtur, dhe pasi ka konstatuar që nuk ka pasur asnjë ndryshim, është ankuar në nivel administrativ dhe më pas penal. Situata e ngacmimit ka vazhduar në kushtet e mosreagimit të frikshëm të institucioneve, gjë që krijon një precedent që vë në rrezik të gjitha gratë dhe vajzat në administratën publike. Të gjitha institucionet e vëna në dijeni nuk kanë reaguar pas marrjes së ankimimit. Drejtoria e Përgjithshme e Tatimeve, Ministria e Financave dhe Prokuroria e Tiranës, nuk kanë marrë asnjë hap për ta verifikuar situatën dhe për ta adresuar atë. Zonja është lënë vetëm dhe viktimë e një ngacmim seksual për 3 vjet, me gjithë barrën psikologjike që kjo sjell. Institucionet që duhej të kishin reaguar menjëherë sapo janë vënë në dijeni janë: Drejtoria e Përgjithshme e Tatimeve, drejtuesi i të cilës ka përgjegjësinë kryesore për lejimin e kësaj situate, Ministria e Financës si institucion epror, Departamenti i Administratës Publike, që ka përgjegjësinë e kodifikimit të politikave kundër ngacmimit seksual në vendin e punës dhe monitorimin e zbatimit të tyre”, deklaroi ajo.
Në fund Malltezi thotë se PD ofron të gjithë mbështetjen morale dhe ligjore punonjëses së administratës, për të vazhduar procedurat gjyqësore ndaj autorit dhe të gjithë zinxhirit të abuzuesve.
“I kërkojmë Prokurorisë së Tiranës, fillimin e menjëhershëm të hetimit. Ju bëjmë thirrje të gjitha grave dhe vajzave, në administratën publike dhe kudo, që të denoncojnë çdo lloj veprimi të ngacmimit seksual në vendin e punës, si dhe i kërkojmë urgjentisht Departamentit të Administratës Publike të kërkojë zbatimin dhe respektimin e Konventës së ngacmimit seksual që ka miratuar Kuvendi. Ky është rasti për një #metoo shqiptare. Ky është rasti për tu dalë zot zonjave, nënave, grave që mbajnë në këmbë, jo vetëm shtëpitë tona, por edhe Shqipërinë”.
Emisioni “Stop” publikoi dy ditë më parë një video ku një nëpunëse i kërkohej nga kolegu ta prekte në faqe dhe i dërgonte mesazhe. Denoncuesja i kishte dërguar email edhe Drejtorit të Përgjithshëm të Tatimeve, Ceno Klosit, për t’i shprehur ankesën për kolegun e saj të quajtur Mexhit Allushi që e përndiqte dhe ngacmonte. Sërish nuk gjeti zgjidhje dhe drejtori nuk ndërmori asnjë veprim.
Pavarësisht të gjitha, problemi kulmoi në Fier, kur Allushi ushtroi dhunë fizike ndaj zonjës në fjalë. Edhe pse çdo gjë është e filmuar sërish nuk u mor asnjë masë.
/a.r
