Nënkryetari i Grupit Parlamentar të Partisë Socialiste, Toni Gogu, ka replikuar me kolegët e opozitës sot në Kuvend lidhur me vendimin e Gjykatës që shfuqizoi masat disiplinore për dissa deputetë të opozitës që shkaktuan incidente javë më parë. Gogu ironizoi sjelljen e opozitës teksa iu kujtoi atyre se për një vendim gjykate, referuar atij për dënimin e Ervin Salianjit, ata dogjën parlamentin dhe sot me hipokrizi vijnë në Kuvend e tundin po një vendim gjykate.
“Për të gjithë kolegët të cilët nuk arrin dot të ndezin zjarr idesh, nuk arrin të ndezin dot zjarr vizioni dhe ndezin karriget. Dhe ngrenë këmbët e karrigeve dhe i bien drejtuesit të punimeve të Kuvendit të shqiptarëve. Dhe vijnë pastaj dhe na tundin vendimin e gjykatës. Këta për një vendim gjykate dogjën parlamentin se nuk iu pëlqente dhe sot thonë se ky vendim gjykate është i padrejtë. Del ai me rekuizitën e teatrit popullor kinez, me rekuizitën e të dënuarve kinezë dhe na tregon se si digjet parlamenti për një vendim gjykate”, deklaroi Gogu teksa iu bëri thirrje opozitës të rikthehet në diskutimet e rendit të ditës për buxhetin.
