Gjatë seancës plenare të mbajtur sot, nënkryetari i Grupit Parlamentar të Partisë Socialiste, Toni Gogu, komentoi akuzat e opozitës për zgjedhjet e 11 majit. Duke u ndalur te rinumërimi, Gogu tha se asgjë s’ka ndryshuar te rezultati dhe se opozita thjesht po vajton humbjen.
“I njëjti rezultat, e njëjta renditje, e njëjta fitore spektakolare e Partisë Socialiste, e njëjtja humbje madhështore e madhështorëve të dështimit. Ndaj ka nisur kjo logoritje e këtij ansambli vajtocësh që nisi nga Tirana, shëtiti nëpër Europë dhe po kthehet sërish në Tiranë me duart bosh sepse Europa në çdo forum të vetin thotë një gjë: Shqipëria pararojë në integrimin europian”, deklaroi Gogu.
“Po, ka ndodhur një vjedhje. Është vjedhja e primareve të tyre. 200 mijë shqiptarë që mungojnë në mbështetjen tuaj. Sot që flasim, vazhdojnë ardhjet e demokratëve që e duan Shqipërinë për t’ju bashkuar forcës që po punon”, tha Gogu.
Në vijim të fjalës Gogu tha se duhet shfrytëzuar më së miri ky moment historik për anëtarësimin e Shqipërisë në BE.
