Gjykata e Apelit është tërhequr për të marrë vendimin në lidhje me vulën e Partisë Demokratike, nëse do të qëndrojë në duart e Enkelejd Alibeajt apo do t’i kalojë kryedemokratit Sali Berisha.
përfaqësuesi ligjor i grupimit të Sali Berishës Ivi Kaso, ka kërkuar mospranimin e ankimimit.
“Mospranimin e ankimit për shkak se Enkelejd Alibeaj nuk legjitimohet, ose të pushojë ankimimin si të pabazuar në ligj dhe prova”, ka deklaruar ai.
Ndërkohë, Indrit Sefa përfaqësues i grupimit të Alibeajt, ka kërkuar pushimin e çështjes dhe prishjen e vendimit të Gjykatës së Shkallës së Parë.
“Kërkojmë pushimin e çështjes ose prishjen e vendimit të Gjykatës së Shkallës së Parë. Ose ne alternative prishjen e vendimit dhe kthimin e çështjes për rigjykim”, ka deklaruar ai.
Seanca në Apel nisi në orën 11:00, dhe trupa gjyqësore do të shqyrtojë ankimimin e Alibeajt, i cili kërkon rrëzimin e vendimit të gjyqtarit Agron Zhukri për njohjen e Kuvendit të Berishës të 11 dhjetorit 2021 si legjitim. Ndërkohë në këtë gjykatë janë shtuar masat e sigurisë.
Ende po vijon seanca në Gjykatën e Apelit për vulën e PD, ndërsa argumentet e palëve janë drejt fundit.
Kujtojmë se gjykata e Shkallës së Parë njohu Kuvendin e Berishës si legjitim për drejtimin e PD.
“Vijon seanca që nga ora 11:00, seancë thelbësore pasi ka të bëjë me lidershipin e PD. Gjykata po shqyrton ankimimin e Enkelejd Alibeaj, ndërsa nga ana tjetër është Rithemelimi ai që ka kompetencat për drejtimin e PD.
Pasi gjykata nuk dha vendim për kërkesës paraprake të Ivi Kasos, iu dha e drejta palës tjetër të parashtrojë deklarimet e veta.
Edhe Oerd Bylykbashi që po flet tani në gjykatë pretendon se argumentet e Alibeajt nuk qendrojnë sepse nuk ka tagrin për të qenë ankimues. Ndaj kërkesa e tij është nul.
Duke mos u pranuar ankimimi mund të lihet në fuqi vendimi i Gjykatës së Shkallës së parë.
Seanca po shkon drejt fundit sa i përket parashtrimit të argumenteve, por mbete për tu parë nëse gjykata do të tërhiqet për të dhënë vendimin sot, apo do kërkojë më shumë kohë dhe do të vendosë nesër. Megjithatë kjo gjykatë zakonisht vendimit i ka dhënë menjëherë sapo ka dëgjuar argumentet, të pakta janë rastet kur ka ndodhur e kundërta. Palët presin që vendimi të jepet ditën e sotme”.
Grupi i Alibeajt përfaqësohet në seancë nga avokati Indrit Sefa dhe Rezart Kthupi, ndërsa përfaqësues nga kryetarit të PD-së Berisha, është Ivi Kaso, i cili shoqërohet nga Oerd Bylykbashi dhe Ledina Mandia.
GJYQI
Gjatë fjalës së tij përfaqësuesi ligjor i Berishës, Kaso ka kërkuar që të Gjykata të konstatojë mospranim e ankimit, pasi gjykata është investuar nga një palë që nuk legjitimohet.
“Gjykata të konstatojë mospranim e ankimit, pasi gjykata është investuar nga një palë që nuk legjitimohet. Sipas nesh vendimi gjyqësor që e ka lejuar ankuesin është marrë në kundërshtim të ligjit”, tha ai.
Nga ana tjetër, përfaqësuesi i Alibeajt tha se nuk është momenti procedural që të ngrihen të tilla pretendime, ndërsa shtoi se gjykata duhet të shqyrtojë të gjitha elementet. Mes të tjerash ai argumentoi se ‘Rithemelimi s’lëshon dot autorizim’.
“Ky nuk është momenti procedural ku ngrihet ky lloj pretendimi. Ne mendojmë se kjo gjykatë duhet t’i shqyrtojë gjithë elementet. Ne kemi bërë edhe shtesat e ankimit tonë. Komisioni i Rithemelimit nuk ka personalitet juridik dhe nuk mund të lëshojë autorizim, që në momentin e parë që i është drejtuar gjykatës. Edhe Shkalla e Parë ka gabuar kur është legjitimuar Ivi Kaso për të paraqitur padinë. Ka një konfondim, a ka legjitimitet Komisioni i Rithemelimit?”, pyeti Sefa trupën gjykuese.
Ivi Kaso: Enkelejd Alibeaj nuk është konfirmuar asnjëherë në detyrë. Nuk ka pasur votëbesim nga Këshilli Kombëtar. Alibeaj është komanduar në detyrë përmes një deklarate nga Sekretari i Përgjithshëm, edhe ky i shkarkuar nga Kuvendi i 11 dhjetorit 2021. i vetmi organ për drejtimin e PD-së është Komisioni i Rithemelimit. Ankimimi është firmosur nga një person që nuk gëzon asnjë tagër.
Indrit Sefa: Lulzim Basha bëri kërkesë në Gjykate dhe tha jam pale e interesuar. Dhe në atë moment gjyqtari Agron Zhukri duhet t’a pushonte çështjen
Gjyqtari: Mos citoni emra gjyqtarësh, por referojuni gjykatës.
Kujtojmë se sot opozita, ka thirrur një protestë kombëtare, e cila do të mbahet para Kryeministrisë. Protesta në fjalë do të nisë në orën 12:00, ndërkohë që Berisha tha se tubimi nuk kishte lidhje me vendimin që do të jepte gjykata për vulën./m.j
