Katër dokumente duhen të dorëzojnë pranë bashkisë Durrës, qytetarët, banesat e të cilëve u dëmtuan nga tërmeti i 26 nëntorit, për të përfituar nga bonusi i strehimit.
Emiriana Sako, drejtore e përgjithshme e Shërbimit Publik, në një intervistë për Agjencinë Telegrafike Shqiptare (ATSH) u shpreh se, “në zbatim të ligjit ‘Për Strehimin’ dhe atë të ‘Emergjencave Civile’ të datës 26 nëntor 2019, dokumentacioni që duhet të plotësojë një qytetar për të përfituar nga bonusi i strehimit, janë: 1- Vërtetim nga njësia e banimit që e ka shpallur objektin e banimit të pabanueshëm; 2- Një akt konstatimi që gjendet pranë bashkisë Durrës; 3- Llogaria bankare; 4- Certifikata familjare, e cila mund të merret nga e-Albania”.
Sako shpjegoi se, vendimet dhe shqyrtimi i dokumentacionit bëhet rast pas rasti.
Sipas saj, ka shumë aplikime, duke qenë se numri i të pastrehëve në rrethin e Durrësit shkon në rreth 6 mijë persona, nga të cilët 4200 persona janë të strehuar në hotele dhe pjesa tjetër ka aplikuar pranë bashkisë Durrës për këtë bonus.
“Me miratimin e këshillit bashkiak Durrës, kemi bërë miratimin e listës së parë paraprake, e cila do të verifikohet për çdo emër specifik, pasi aktet e konstatimit nuk kanë mbaruar për të gjithë banorët dhe do të duhet të rakordohen në finale emrat e miratuar”, – tha ajo.
Sako ritheksoi se, për të aplikuar për bonusin e strehimit duhet që qytetarët të kenë vërtetimin nga njësia administrative përkatëse, banori të ketë një llogari bankare gjithashtu akti i konstatimit, i cili gjendet paranë bashkisë Durrës ose tek njësia administrative nga grupet e inxhinierëve që kanë verifikuar në terren objektin dhe certifikata familjare.
“Çdo material duhet dorëzuar pranë Bashkisë Durrës dhe me këto dokumente kryhet aplikimi, i cili më pas fillon të trajtohet nga ana e institucionit tonë që është Drejtoria e Shërbimit Publik”, – tha Sako.
