Nga e hëna, të gjithë tifozët shqiptarë që duan një biletë për në ndeshjen Poloni-Shqipëri, e vlefshme për play Off-in e Botërorit, mund të aplikojnë përmes platformës t-Ticket. Në një postim nga Federata Shqiptare e Futbollit, tifozët që dëshirojnë të aplikojnë duhet të regjistrohen paraprakisht në platformë duke krijuar një llogari personale dhe çdo aplikant do të ketë mundësi të aplikojë vetëm për dy bileta, pa mundësi për të kërkuar më pak apo më shumë.
Për shkak të numrit të kufizuar të biletave në dispozicion për tifozët kuqezi, përzgjedhja do të bëhet përmes një shorti elektronik. Procesi i aplikimit do të jetë i hapur për një periudhë 48 orë. Pas përfundimit të kësaj periudhe, sistemi do të përzgjedhë në mënyrë rastësore aplikantët fitues.
Fituesit do të njoftohen përmes e-mail-it, ku do të marrin një link të personalizuar për të përfunduar pagesën e biletave. Pasi të kenë përfunduar të gjitha këto etapa, tifozët fitues do të marrin një link përkatës për të aksesuar biletat e tyre.
Kombëtarja shqiptare është shumë pranë ëndrrës për një biletë historike në Botëror. Dueli Poloni-Shqipëri është ndeshja që do të vendos shumë për fatin e kuqezinjve më tej. Dueli është i programuar në 26 mars në Varshavë në orën 20:45 dhe në rast se kuqezinjtë fitojnë, në finalen e play-off-it që të dërgon në Botërorin 2026 do të luajë ndaj fituesit të çiftit Ukrainë/Suedi.
