Çështja e dekriminalizimit është rikthyer sërish si kryetemë e aktualitetit politik në vend. Mosmarrëveshjet për aktet nënligjore, si dhe amendimet që kanë kërkuar demokratët, duket se po vënë në vështirësi procesin. Pak para nisjes së seancës parlamentare të kësaj të enjteje, kryetari i Grupit të Deputetëve të LSI Petrit Vasili, deklaroi për mediat se nuk do të ketë kthim para për dekriminalizimin, por do të nisë zbatimi i tij. Ai tha se do të gjendet konsensusi me opozitën.
“Nuk ka asnjë kthim prapa për zbatimin e ligjit të dekriminalizimit. Ligji për dekriminalizimin është miratuar me konsensus”, ka thënë Vasili.
Ai ka nënvizuar se, “konfliktualiteti i klimës politike është i panevojshëm” dhe ka theksuar se, “LSI është pjesë e një procesi konsensual”.
“Do të shkojmë drejt një konsensusi të ri”, ka thënë Vasili.
Ndërsa deputeti i PD, Oerd Bylykbashi ka akuzuar mazhorancën se po bën manovra për të shpëtuar deputetët e saj të inkriminuar.
“PS, nëpërmjet formularit të saj kërkon të shpetojë kriminelët. Formulari po përdoret si instrument për të shmangur zbatimin e ligjit. Ka përpjekje të mazhorancës që konsensusi i 17 dhjetorit të prishet”-tha Bylykbashi.
