Mesa duket Dekriminalizimi mund të hyjë shumë shpejt në një fazë ngërçi ligjor, pasi sipas një memoje të dalë nga zyra juridike e Parlamentit, kushtetutshmëria e akteve nënligjore të këtij ligji, që pritet të shqyrtohen në formën e një projekvendimi në Këshillin e Rregullores dhe Mandateve këtë mbrëmje, bie në kundërshtim me ligjin themeltar të shtetit.
Sipas memos, propozimet që parashikohen për aktet e Dekriminalizimit i tejkalojnë kompetencat e kuvendit dhe si rezultat Këshilli Rregullores dhe Mandateve nuk është organi kopetent për t’i miratuar ato.
Zyra juridike e sqaron kështu pretendimin e saj:
Duke qenë se projektvendimi ka karakteristikat e një akti normativ me fuqi në të gjithë vendin, ai del jashtë kompetencave të Kuvendit. Zyra juridike bën të ditur se, funksionin e vet kushtetues legjislativ, Kuvendi nuk mund ta ushtrojë përmes projektvendimeve, por nëpërmjet ligjeve.
Përsa i përket përmbajtjes, zyra juridike vëren si shkelje kushtetuese faktin se, ky projektvendim, që votohet me shumicë të thjeshtë, i ngarkon Prokurorisë detyra, që sipas Kushtetutës ajo mund t’i kryejë vetëm me ligj.
Kjo memo vjen në një kohë kur presioni politik i opozitës në lidhje me Dekriminalizimi është në rritje. Këtë të markurë lideri opozitës Basha paralajmëroi se nëse parlamenti nuk e miraton dekriminalizimin, atëherë opozita do të bllokojë punimet e seancës së nesërme.
Prej disa ditësh tashmë PD dhe PS janë në negociata mes tyre në lidhje me formularin e vetëdeklarimit, i cili është dhe akti kyç nënligjor i të gjithë Dekriminalizimit. Por negociatat ende nuk kanë prodhuar një variant të këtij formulari, që të kënaqë të dyja palët.
Pikërisht ky akt nënligjor, propozohet, ndër të tjera, për tu miratuar përmes një projekvendimi, që sipas memos së zyrës juridike, është në shkelje dhe jo në tagër të Këshillit të Rregullore e Mandateve.
