Eurodeputeja Doris Pack ka shprehur habinë për kontigjentin e deputetëve me të dhëna kriminale në parlamentin shqiptar. Në një intervistë me ABC News, Pack thotë se ata prishin imazhin e Shqipërisë në botë.
Ajo theksoi se rastet e deputetëve të inkriminuar kanë peshë të madhe në ndërtimin e një imazhi negativ per Shqipërinë në botë. Pack e sheh arsyen e migrimeve masive nga Shqipëria, vetëm në situatën e rënduar politike në vend.
“Nuk e kuptoj pse kemi kaq shumë shqiptarë që braktisin vendin. Nëse do të isha në vendin e Ramës, do të pyesja pse ndodh kjo? Pashë shifrat e azikërkuesve shqiptarë në muajin shtator në Gjermani dhe është vërtet e pabesueshme. Ajo që pritet është që t’i jepet një perspektivë të rinjve që të qëndrojnë në vendin e tyre, të kontribuojnë në tranformimin dhe civilizimin e tij dhe të kenë një perspektivë të qartë punësimi. Unë kuptoj që ka njerëz që kërkojnë një jetë më të mirë, por momenalisht është e pamundur, pasi ne duhet të strehojmë personat që ikin nga luftra dhe konfliktet”.
E pyetur nëse kjo lidhet me situatën politike në vend, Pack tha: “Ndoshta është një koiçidencë, por shtrohet pyetja, pse shqiptarët nuk iknin para se Shqipëria të ishte një vend kandidat dhe ikin tani që Shqipëria është një vend kandidat? Besoj se ka një lidhje me situatën politike. Sot në shoqërinê shqiptare duhet vërtet të shtrojmë pyetjen nëse duhet të jesh kriminel për t’u bërë deputet. Nuk e konceptoj se si ata që qeverisin vendin nuk e kuptojnë që kjo përcjell një imazh të tmerrshëm për vendin. Të gjithë e shohin, të gjithê flasin pêr këtë, por as Rama dhe as Meta nuk e marrin seriozisht. Ndoshta jam e gabuar, por nuk besoj të jem, sepse informohem rregullisht dhe lexoj përditë përmbledhjen e shtypit shqiptar. Klasa politike në Shqipëri duhet pastruar. Nëse përcillet një imazh kaq negativ, njerëzit nuk durojnë më dhe braktisin vendin”.
Pack foli edhe për fenomenin e përfshirjes së ambasadave të huaja në zhvillimet politike në vend: “Shqipëria është i vetmi vend ku çdo ambasadë ka çdo ditë diçka për të thënë. Nuk më duket shumë e shëndoshë kjo, sepse roli i ambasadës nuk është për të bërë politikë, por për të informuar shtetin e saj, se ç’ndodh në Shqipëri. Por është dhe politika shqiptare që favorizon këtë. Ka qenë gjithmonë kështu, jo vetëm gjatë kësaj qeverie, por edhe gjatë qeverive të mëparshme. Gjithmonë kanë hedhur sytë se ç’farë thonë ambasadat e huaja. Herë pas here, kemi përshtypjen që ambasadorët nuk janë neutralë. Kjo duhet thënë. Unë e kam thënë vazhdimishtt dhe madje kjo gjë është përfshirë edhe në një raport”.
