Një ditë pas ankimimit të kryebashkiakut të Tiranës, Erion Veliaj, në Gjykatën Kushtetuese ndaj vendimit të Këshillit të Ministrave për shkarkimin e tij, Presidenti Bajram Begaj dekretoi të mërkurën mbajtjen e zgjedhjeve të parakohshme në 6 bashki të vendit më 9 nëntor. Vendimi i Kreut të Shtetit ka shkaktuar reagime të forta në politikë dhe në fushën juridike.
Avokati Jordan Daci, në një lidhje direkte për Klan News me moderatorin Drini Zeqo, e cilësoi dekretin e Presidentit si një akt antikushtetues. Sipas tij, Begaj ka anashkaluar autoritetin e Gjykatës Kushtetuese, e cila është institucioni i vetëm që mund të shqyrtojë ankimime të tilla.
“Unë e shoh si një kronikë të paralajmëruar, por gjithsesi jo kushtetuese për arsye shumë të thjeshta, sepse jo më larg se dje reagoi Gjykata Kushtetuese. Është më se e qartë se ankimimi bëhet vetëm në Gjykatën Kushtetuese. Arsyetimi i presidentit është tepër foshnjor dhe nuk qëndron aspak në aspektin juridik,” u shpreh Daci.
Ai theksoi se një president serioz duhet të kishte zgjedhur të priste vendimin e Gjykatës Kushtetuese dhe jo të ndërmerrte një hap që, sipas tij, sjell pasoja të pariparueshme për rendin kushtetues.
“Një president më mirë zgjedh t’i drejtohet Gjykatës Kushtetuese sesa të zgjedhë të shkelë Kushtetutën në mënyrë të shpejtë,” tha ai.
Daci tha gjithashtu se Gjykata Kushtetuese mund të ndërhyjë për të pezulluar organizimin e zgjedhjeve deri në shqyrtimin e ankimit të paraqitur nga Veliaj. “Nëse kjo ndodh, atëherë presidenti nuk ka më asnjë mburojë juridike përpara asaj që ka bërë, sepse praktikisht ka konsumuar një shkelje të rëndë kushtetuese.”
Ky zhvillim pritet të thellojë më tej tensionin politik mes mazhorancës dhe opozitës, ndërkohë që mbajtja ose pezullimi i zgjedhjeve të shpallura më 9 nëntor mbetet tashmë në dorën e Gjykatës Kushtetuese.
