“Alienët ekzistojnë dhe janë të rrezikshëm”. Këto kanë qenë fjalët e astrofizikanit të njohur Stephen Hawking, i cili i ka ftuar të gjithë të ndalojnë së tentuari që të kontaktojnë apo të lidhen me alienët, pasi rezultati do të ishte shumë i frikshëm dhe i rrezikshëm për të gjithë racën njerëzore.
Në filmin e ri të hedhur online, i cili quhet “Stephen Hawking’s Favourite Places” ai ka shprehur edhe një herë bindjet e mendimet që ka. “Sa më shumë që plakem, aq më shumë bindem që nuk jemi të vetëm. Pasi kam kaluar një jetë mes pyetjesh, po jap kontributin tim në një projekt global për të gjetur më në fund një përgjigje”, – shprehet astrofizikani.
“Projekti Breakthrough Listen do të kalojë pranë miliona yjeve më të afërta me Tokën në kërkim të gjetjes së sinjalit të jetës, por e di se ka një vend nga ku mund të nisim të shikojmë. Ndonjë ditë, ndoshta do të marrim ndonjë sinjal nga ndonjë planet, siç mund të jetë planeti Gliese 832c, por duhet të jemi shumë të vëmendshëm që dallojmë momentin kur sinjali do të vijë dhe të dimë si të përgjigjemi”, – janë fjalët e Hawking shkruan JOQ.
Ai shprehet skeptik për mundësitë që njerëzit kanë për tu vendosur në kontakt me alienët duke mbështetur mendimin se ata kanë një inteligjencë shumë më të zhvilluar se e jona, por që nuk duhet të rrezikojmë shumë pasi pasojat mund të jenë shkatërruese./a.m.
