Ish-ministri i Jashtëm, Paskal Milo, komentoi në studion e emisionit “Të Paekspozuarit” në MCN TV, deklaratën e Donald Trump Jr. në Beograd se sulmet e NATO-s ndaj Serbisë në 1999 u bënë për të hequr vëmendjen nga skandali seksual i ish-presidentit Bill Klinton me stazhieren Monika Levinski.
Milo kujtoi atë kohë kur ishte ministër dhe këto akuza u artikuluan nga republikanët në tetor 1998 për të fituar zgjedhjet në Kongres.
Ai tha se pavarësisht interesve të biznesit që ka djali i Trump në Serbi, deklarata e tij ishte e një natyre politike.
“Kjo vizitë mund të quhet neutrale nga pikëpamja politike, por përvoja ka treguar se misione të tilla që mund të kenë etiketë profesionale, biznesi, fshehin diçka tjetër. Këtë politika e përdor si instrument, se nuk duan të dalin publikisht dhe ndërtojnë misione të tilla për të përgatitur terrenin.
Është e qartë se ka një interes biznesi mes kompanive të Trump, por nuk fshihet dhe deklarata te fundit tregojnë një begraund politik.
Së bashkë me ambasadorin Agim Nesho kemi qenë prezentë në momentet e skandalit të Monika Levinskit në 1998, kur para Jurisë së Madhe dhe prokurorit Keneth Starr doli Klintoni dhe dëshmoi. Ditën tjetër Klinton foli para OKB-së. Unë dhe Nesho ishim prezentë. Mbajti një fjalim të jashtëzakonshëm dhe e gjithë salla u ngrit në këmbë dhe e duartrokiti shumë gjatë.
Në tetor, pas fjalimit ka qenë një akuzë tjetër nga opozita republikane e kongresit për ta shkarkuar, sepse ishin edhe zgjedhjet e pjesshme për kongresin në nëntor. Në këtë kohë u artikulua kjo akuzë ndaj Klintonit, që thotë tani Donald Trump Jr.”- tha Milo.
