Dy muaj armëpushim mes Izraelit dhe Hamasit kanë dështuar pasi ushtria izraelite ka sulmuar Gazën për të eliminuar objektivat e Hamasit
“Izraeli, që tani e tutje, do të veprojë kundër Hamasit me fuqi ushtarake në rritje”, tha zyra e kryeministrit Benjamin Netanjahu.
Nga sulmi i sotëm, mësohet se mes të vdekurve janë figura të larta të sigurisë dhe politike të Hamasit. Nga ana e tyre mjekët shprehen se mes të vrarëve janë edhe shumë fëmijë.
Nga ana e saj, Ministria e Shëndetësisë në Gazë e drejtuar nga Hamasi thotë se numri i të vdekurve nga sulmi izraelit gjatë natës ka shkuar deri në 330 të vrarë.
Hamasi ka reaguar duke thënë se kjo çon në përshkallëzimin e konfliktit dhe se Izraeli ka shkelur në mënyrë të njëanshme armëpushimin duke vënë në rrezik fatin e pengjeve.
Me mbështetjen e SHBA-së, Izraeli ka bërë presion për kthimin e pengjeve në këmbim të një armëpushimi afatgjatë dhe lejimin e kthimit të ndihmës në Gazë. Nga ana tjetër, Hamasi ka këmbëngulur që t’i jepet fund luftës një herë e mirë si dhe tërheqje të plotë të trupave izraelite nga Gaza në përputhje me kushtet e marrëveshjes origjinale të armëpushimitm, transmeton BBC.
Shtëpia e Bardhë ka bërë të ditur se ishte informuar nga Izraeli për sulmet e fundit dhe se në vend të një marrëveshjeje të re, Hamasi kishte zgjedhur “refuzimin dhe luftën”.
Kjo është vala më e madhe e sulmeve ajrore që nga 19 janari, kur hyri në fuqi armëpushimi. Dy ditë më parë, bisedimet në Doha, të cilat zgjatën për 72 orë, ku u përfshinë zyrtarë të nivelit të lartë nga Egjipti, Katari dhe SHBA, nuk arritën të zgjasin fazën e parë të armëpushimit, apo të kalonin në fazën e dytë.
Sipas deklaratës zyrtare të qeverisë izraelite, kryeministri Benjamin Netanjahu dhe ministri i Mbrojtjes Israel Katz urdhëruan sulmet të martën në mëngjes.
“Ky sulm vjen pas refuzimit të përsëritur të Hamasit për të liruar pengjet tanë, si dhe refuzimin e tij të të gjitha propozimeve që ka marrë nga i dërguari presidencial i SHBA Steve Witkoff dhe nga ndërmjetësit. Izraeli, tani e tutje do të veprojë kundër Hamasit me fuqi ushtarake në rritje”, thuhet në deklaratën zyrtare të qeverisë izraelite.
