Ngjarja e përgjakshme në Nea Smyrni duket se është një rast vrasjeje të një gruaje, ku jashtë një pallati u gjetën të vdekur një burrë dhe një grua, pak para orës 05:30 të mëngjesit të së dielës. Gruaja që jetonte në pallat është identifikuar. Ajo ka lindur në Shqipëri në vitin 1981 (45 vjeç) dhe ka një kartë identiteti greke. Një mjek ligjor pritet në vendngjarje, ku do të përcaktojë se sa plumba ka marrë 45-vjeçarja.
Sipas të dhënave të deritanishme, burri qëlloi 45-vjeçaren dhe më pas vrau veten. Incidenti duket se ka ndodhur për motive personale, ndërsa çifti ndoshta nuk ishte i martuar. E ndjera kishte kohë që jetonte në pallat me vajzën e saj.
Nga materiali i mbledhur nga oficerët e Departamentit të Vrasjeve, gjithçka tregon se burri i kishte ngritur pritë 45-vjeçares. Kur ajo mbërriti në hyrjen e pallatit, në rrugën Grigoriou Kydonion, dyshohet se ai e qëlloi me armë, duke e plagosur për vdekje, dhe më pas e drejtoi të njëjtën armë ndaj vetes, duke i dhënë fund jetës.
Pamjet filmike dhe arma, prova kyçe për zbardhjen e plotë të çështjes
Policia ka gjetur armën, ndërsa një rol të rëndësishëm në zhvillimin e hetimeve duket se kanë luajtur pamjet e kamerave të sigurisë së pallatit.
Në pamje regjistrohet burri duke pritur gruan – të dy me origjinë shqiptare – më pas duke drejtuar armën ndaj saj dhe duke hapur zjarr, përpara se të vriste veten.
“Dëgjova disa zhurma shumë të forta”
Sipas dëshmive të banorëve të zonës, u dëgjuan tre zhurma të forta, të ngjashme me të shtëna me armë, por jo njëra menjëherë pas tjetrës.
Duke folur për Orange Press Agency që citon noa.al, një banore e zonës përshkroi momentet e alarmit që u krijuan në lagje në kohën kur ndodhi ngjarja.
“Po flija, por nuk isha në gjumë të thellë në shtëpi. Papritur dëgjuam të paktën tre zhurma shumë të forta. Nuk e dinim nëse ishin të shtëna apo jo, por ishin jashtëzakonisht të forta. Unë numërova tre. Nuk ishin njëra pas tjetrës; kishte një interval prej tre, katër, pesë sekondash mes tyre”, tha ajo.
Sipas saj, reagimi i autoriteteve ishte i menjëhershëm, ndërsa në fillim askush nuk mund ta imagjinonte se çfarë kishte ndodhur saktësisht.
“Pas pak u dëgjua sirena e makinës së policisë. M’u duk sikur diçka ra nga shumë lart. Nuk e di, sepse është në rrugën paralele dhe mes nesh ka pallate, kështu që as nuk dolëm jashtë për të parë, asgjë. Nuk e besova, nuk më shkoi ndër mend se ishte e shtënë me armë, por ishte…”, përfundoi ajo.
Vrasja e gruas në Nea Smyrni: Hetimet vazhdojnë
Sipas informacioneve të para, në pallatin jashtë të cilit ndodhi ngjarja e përgjakshme nuk banonte 45-vjeçarja, por vajza e saj.
Në të njëjtën kohë, po hetohet edhe marrëdhënia që ajo kishte me burrin që e vrau, pasi të njëjtat informacione bëjnë me dije se ata mund të mos kenë qenë të martuar.
Pamjet filmike dhe arma konsiderohen prova kyçe për zbardhjen e plotë të çështjes, hetimin e së cilës e ka marrë përsipër Drejtoria për Luftën kundër Krimit të Organizuar.
Hetimet janë në vazhdim për të përcaktuar rrethanat e sakta në të cilat ndodhi ngjarja e përgjakshme.
Autoritetet tashmë po shqyrtojnë të gjitha të dhënat lidhur me motivin dhe marrëdhënien që burri kishte me 45-vjeçaren.
Dyshohet se çifti kishte një histori të mëparshme mes tyre dhe, në vitin 2024, gruaja e kishte denoncuar burrin në Komisariatin e Policisë së Akropolit për përvetësim të pasurisë.
Ajo kishte deklaruar se burri i kishte marrë një motor.
Edhe burri ishte me origjinë nga Shqipëria dhe banonte në Kallithea.
