Danimarka po përgatit një ligj të ri që synon të ndalojë shpërndarjen e videove, imazheve dhe regjistrimeve audio të krijuara me inteligjencë artificiale, që imitojnë në mënyrë realiste fytyrën ose zërin e një personi pa pëlqimin e tij.
Projektligji parashikon ndryshime në ligjin danez për të drejtat e autorit dhe do të mbrojë jo vetëm artistët, por edhe qytetarët e zakonshëm nga përdorimi i paautorizuar i identitetit të tyre në përmbajtje të krijuara me AI. Deepfake-t mund të përdoren për të bërë një person të duket sikur thotë diçka që nuk e ka thënë apo bërë në të vërtetë, duke krijuar rrezik për dezinformim, mashtrime dhe dëmtim të reputacionit.
Ministrja daneze e Kulturës, Zenia Stampe, tha se një nga synimet kryesore të ligjit është që platformat e mëdha teknologjike të reagojnë më shpejt dhe të heqin përmbajtjet e manipuluara, në mënyrë që dëmi ndaj personave të prekur të jetë sa më i vogël.
Rregullat do të kenë disa përjashtime për satirën, parodinë, karikaturën dhe kritikën ndaj pushtetit apo shoqërisë. Megjithatë, këto përjashtime nuk do të vlejnë kur përmbajtja e rreme përbën një rrezik serioz për të drejtat, sigurinë, jetën e njerëzve.
Nisma daneze vjen në një kohë kur përdorimi i inteligjencës artificiale për krijimin e deepfake-ve po përhapet me shpejtësi në internet. Vëmendje të veçantë kanë marrë edhe deepfake-t me përmbajtje seksuale, të cilat shpesh krijohen dhe shpërndahen pa dijeninë apo pëlqimin e personave të paraqitur.
Danimarka synon që ligji i ri të hyjë në fuqi në fillim të vitit 2027.
Me ligjin e ri, Danimarka synon të forcojë mbrojtjen e identitetit dhe imazhit të njerëzve në epokën e inteligjencës artificiale, ku një fotografi, video apo regjistrim zëri mund të manipulohet në pak sekonda dhe të shpërndahet menjëherë në rrjetet sociale.
