Seanca e sotme plenare u karakterizua nga debatet e forta dhe replikat ndërmjet Kryeministrit Edi Rama dhe Kreut të Grupit Parlamentar të PD Edi Paloka. Debati me tyre u karakterizua lidhur me gjyqin ndërmjet të dyve.
Sipas kryeministrit Rama, Paloka është një shpifës profesionist dhe këtë e tregoi edhe në gjyq. Duke e cilësuar atë një “hallexhi që ha vetëm në kurriz të broçkullave që i thotë partia”, Rama u shpreh se edhe me vendim gjykate u vërtetua se nga akuzat e opozitës nuk ka asnjë fakt por vetëm shpifje.
Ndërsa nga krahu tjetër, Paloka tha se Rama u bëri presion e telefon gjykatësve dhe kjo duket edhe në raportin e OSBE ku ndaj tij dhe Ristanit janë shkelur të drejtat e njeriut.
DEBATET RAMA-PALOKA
Rama: Kriminelët i përcakton gjykata. Kush është i dënuar me vendim gjykate është padiskutim. Unë e di që për ju jam kryekrimineli por s’keni çbëni do ta përballoni. Ose ky që në gjykatë tha unë s’kam punë me këtë, por më thotë partia. Unë këtë punë kam, marr lekë për të folur kot.
Paloka: T’i kam thënë në sy, t’i kam thënë kudo. Nga salla e gjyqit ike ti duke turfulluar ky është kurth. Ike ti edhe pse deklarove se do të vij në çdo seancë. Nuk erdhe më në seancë me mua. Sa për dënimin, se ti e ke në zakon i merr në telefon, ky raport i fundit i OSBE-së na përmend me emra. Nuk jemi ne të dënuar, por raporti na përmend mua dhe Ristanit si shkelje e të drejtave të njeriut.
Rama: Tek gjyqi historia është shumë e thjeshtë, dy shpifës profesionistë nuk është se dhanë opinione. Folën publikisht për fakte, dhe për këto fakte unë ju ftova në gjykatë të jepinit një provë. E vetmja provë që dhatë është se ju jeni hallexhinj, i jeni futur kësaj pune se punë tjetër harrojeni se dini të bëni tjetër gjë. Ti ato që thua janë ato që thonë të tjerët dhe ti thua se i mendon. Por ti dhe mendimi jeni pa asnjë pikë përputhje. Mes teje dhe mendimit qëndron partia, sepse ti ha bukë duke thënë çdo gjë që partia ka turp t’i thotë. Kështu që shko e ha përshesh sepse hallall punën që të thotë partia ti e qan.
Paloka: Ti ke qenë i dështuar gjithë jetën. U bërë kryeministër për të hapur ekspozita dhe jo për të drejtuar. Ti vazhdo merru me zotësitë tona se zotësitë tua po i shohim përditë.
