Përfaqësuesit e Partisë Demokratike dhe Qeverisë janë përplasur ashpër në emisionin “Opinion” lidhur me prerjen e pemëve dhe ndërtimin e një parku lodrash në Parkun e Liqenit.
Debati arriti deri në atë pikë saqë këshilltari demokrat në Këshillin Bashkiak të Tiranës, Besnik Aliaj braktisi emisionin.
Gjatë debatit zv.kryeministri Niko Peleshi i kujtoi Aliajt faktin se ai si arkitekt ka fituar disa tendera nga qeveria e majtë dhe e pyeti nëse ka paguar rryshfet për to.
Në përgjigje të kësaj deklarate Aliaj u shpreh se ishte i gatshëm të mbronte projektet e tij.
Por kulmi i debatit arriti kur nënkryetari i Bashkise Arbi Mazniku prezantoi planin për hyrjen te Parku i Liqenit.
“Bëni çfarë të doni, une votoj pa asnjë lloj emocioni, pa asnjë lloj kompeksi kundër kafshimit të një pjese tjetër të parkut dhe në mënyrë demonstrative unë largohem nga emisioni. E bëj sepse kam detyrim ndaj qytetarëve dhe mendoj se kjo është vepra e fundit për të shkatërruar atë copë parku që ka mbetur”, tha Aliaj dhe braktisi emisionin.
