Ministri për Evropën dhe Punët e Jashtme, Ferit Hoxha, ka reaguar pas debatit të krijuar nga deklaratat e ministrit të Jashtëm të Serbisë Marko Gjuriç, për mundësinë e hapjes së një konsullate serbe në Shqipëri, konkretisht në Shkodër.
Në një reagim në rrjetin “X”, Hoxha bëri të ditur se Shqipëria ka kërkuar hapjen e një Konsullate të Përgjithshme në Luginën e Preshevës, ndërsa Serbia ka kërkuar hapjen e një Konsullate të Përgjithshme në Shkodër.
Sipas tij, veprimet konkrete do të ndërmerren vetëm pasi të ketë dakordësi të plotë mes dy palëve për të gjitha aspektet e procesit.
Ministri theksoi se reciprociteti është një parim themelor i marrëdhënieve diplomatike dhe një instrument i politikës së jashtme për avancimin e interesave kombëtare, duke sqaruar se ai nuk nënkupton domosdoshmërisht barazi në objektiva apo interesa, por shërben si bazë për mirëkuptimin mes shteteve.
Më tej, Hoxha nënvizoi se synimi kryesor i Shqipërisë është krijimi i një pranie të përhershme konsullore në Luginën e Preshevës, ku jeton një komunitet i rëndësishëm shqiptar.
Sipas tij, kjo përfaqësi do të mundësojë ofrimin e një mbështetjeje më të drejtpërdrejtë për qytetarët shqiptarë, forcimin e lidhjeve të tyre me Shqipërinë dhe mbrojtjen më efektive të të drejtave e interesave të tyre legjitime.
Në përfundim, Hoxha theksoi se politika e jashtme e Shqipërisë ndërtohet mbi interesin kombëtar, respektimin e së drejtës ndërkombëtare dhe vlerave evropiane, standarde që, sipas tij, do të udhëheqin vendimmarrjen e vendit edhe në rrugën drejt anëtarësimit në Bashkimin Evropian.
Reagimi i Ministrit të Jashtëm Ferit Hoxha:
Deklarimi i Ministrit të Jashtëm të Serbisë për mundësinë e hapjes së një konsullate në Shqipëri ka ngjallur debat.
Shqipëria ka kërkuar hapjen e një #Konsullate të Përgjithshme të Republikës së Shqipërisë në Luginën e #Preshevës. Serbia, nga ana e saj, ka kërkuar hapjen e një Konsullate të Përgjithshme në Shkodër. Nëse dhe kur palët të bien dakord për çdo aspekt dhe detaj të këtij procesi, në momentin e duhur do të ndërmerren veprimet përkatëse.
Në praktikën e konsoliduar diplomatike, reciprociteti është një parim themelor i marrëdhënieve ndërmjet shteteve dhe një instrument i politikës së jashtme për të avancuar interesat kombëtare.
Ai nuk nënkupton domosdoshmërisht barazi në përmbajtje, në objektiva apo në interesat e secilës palë. Reciprociteti është qasja mbi të cilën ndërtohet mirëkuptimi ndërmjet shteteve, jo një masë mekanike me të cilën maten veprimet apo rezultatet.
Synimi dhe interesi i Shqipërisë është të krijojë më në fund një prani konsullore të përhershme në Luginën e Preshevës, një zhvillim i vonuar, në një hapësirë ku jeton një komunitet i rëndësishëm shqiptar. Kjo do të krijojë mundësi më të mira për të qenë më pranë qytetarëve shqiptarë atje, për t’i mbështetur ata në mënyrë më të drejtpërdrejtë dhe për të kontribuar në mbrojtjen e interesave të tyre legjitime.
Është e çuditshme, madje e vështirë për t’u kuptuar, që shumë prej reagimeve zgjedhin të anashkalojnë pikërisht atë që është thelbësore: interesin e #Shqipërisë dhe përfitimin konkret që sjell krijimi i një pranie të përhershme konsullore shqiptare në Luginën e Preshevës. Në vend që vëmendja të përqendrohet te mbështetja që kjo përfaqësi do t’u ofrojë shqiptarëve që jetojnë atje, te forcimi i lidhjeve të tyre me Shqipërinë dhe te mbështetja më e mirë e të drejtave dhe interesave të tyre legjitime, debati zhvendoset tek hamendësimet mbi interesat e supozuara të palës tjetër.
Politika jonë e jashtme nuk ndërtohet mbi emocione apo perceptime, por mbi interesin kombëtar, respektimin e normave dhe praktikave të së drejtës ndërkombëtare, si dhe mbi frymën dhe vlerat evropiane.
Ky është standardi ynë sot, por edhe standardi që Shqipëria synon të mbajë si vendi i ardhshëm anëtar i Bashkimit Evropian. Ne jemi të vendosur ta përfaqësojmë këtë qasje në çdo vendimmarrje të politikës sonë të jashtme.
Ministi i Jashtëm i Serbisë, Marko Gjuriç, duke folur për “Radio Beograd”, shprehu kënaqësinë për bisedimet e fundit me ministrin e ri të Jashtëm të Shqipërisë, Ferit Hoxha, ndërsa kjo deklaratë nxiti reagime publike.
“Jam i kënaqur që pata bisedime kaq të mira me ministrin e ri të Jashtëm të Shqipërisë, Ferit Hoxha, me të cilin arritëm një marrëveshje në parim për hapjen e zyrave konsullore në Shkodër dhe në Bujanoc”, tha Gjuriç për median serbe.
