Është shoqëruar me debate mbledhja e djeshme e strukturave të PS-së në Shkodër, ku struktura të së majtës kanë kërkuar rikthimin e Tom Doshit në radhët e selisë rozë.
Ish-kreu i Bërdicës, Besnik Brahimi, i ka kërkuar Bushatit të rishitet pozicioni i Tom Doshit, pasi ishte pikërisht koha e tij që bëri që PS-ja të arrinte një fitore historike në Shkodër në vitin 2013.
Ndërsa nga ana e tij, deputeti i PS Paulin Sterkaj e ka quajtur të turpshme humbjen e PS-së në zgjedhjet e 21 Qershorit.
Debatet
Ditmir Bushati: “Na duhen më shumë forca në terren. Do të bëjmë verifikimin. Faza e dytë janë zgjedhjet në parti. Qëllimi kryesor është t`i përfshijmë të gjithë, edhe ata që humbën në zgjedhje. Prioritet duhet të jetë dyfishim i PS e jo të shkojmë në zgjedhje dhe të bëjmë lojën e zakonshme me paracaktim të drejtuesve. Na duhet ndershmëri maksimale në këtë proces. Kushdo ka të drejtë dhe mund ta provojë veten. Në këtë proces nuk do të ketë më një lojë që nuk na rezultoi pozitive. Deri të premten do të hartohet lista paraprake ku çdo të deleguari t`i jepen dy-tri organizata të PS në qytetin e Shkodrës bashkë me historikun elektoral të secilës zonë”.
Paulin Sterkaj: “Do ishte më mirë një analizë. Duhet të shihet puna e punësimit pasi një pjesë e administratës nuk ka funksionuar si duhet. Nuk është diskutuar asnjëherë. Të korrigjojmë administratën që si të depolitizuar çuan votat te partitë e tjera. Bashkë, ne, deputetët, do të bëjmë një koordinim të mirë. Nuk është mbledhje për punësimin pasi situata është jo e mirë në Shkodër dhe Shqipëri. Reforma kishte në gjithë Shqipërinë, por nuk humbëm kështu. 10 mijë vota minus në Shkodër PS, është e turpshme”.
Bushati: “Të shohim raportet në koalicion, sa është respektuar marrëveshja dhe sesi ka funksionuar. Nuk kemi një strukturë ekstra për emërimet, por duhet të kemi një tryezë të përbashkët për të parë se çfarë nuk ka funksionuar”.
Sterkaj: “Shumë njerëz marrin trofe dhe thonë unë, unë, por duhet të përfitojnë ata që kanë kontributin maksimal. Administrata në Shkodër është bërë me njohje dhe lidhje dhe jo kontribute”.
Besnik Brahimi: “Kur erdhi Tom Doshi dhe më tha të kontribuoja për PS-në fituam në 2013 me një fitore historike. Pritej shumë. Pas fitores, shumë drejtorë u vendosën pa meritë. Janë të gjithë të PD-së në administratë. Në Bërdicë asgjë nuk është bërë. Në Shkodër s’ka PS. Ku ka anëtar këshilli nga jeta civile?! Po ne ça jena? Anëtarët e këshillit nuk e meritojnë të jenë aty. Vini dorë se s’keni gjë në terezi, pasi punësimi është zero”.
Bushati: Jemi pak dhe duhet të rritemi në numër dhe të mos krijojmë situatë grupazhesh. PD ishte në ditën më të keqe dhe fitoi. Duhet të bashkohemi. Deputetët do të kenë një përgjegjësi më të madhe politike, ndërsa të deleguarit do të kenë përgjegjësi për organizatat. FRESH dhe organizata e gruas duhet të kenë më shumë peshë. Duhet të zgjerohemi në territor. Nuk mendoj që Jozefina Topalli dhe Voltana Ademi mbollën lule dhe fituan në Shkodër. Do të vij të mbjellë edhe lule, por le të jemi më të hapur me njëri-tjetrin. Nëse nuk kanë funksionuar këta njerëz që kemi, duhet të gjejmë të tjerë dhe të zgjerohemi.
