Sesioni i ri parlamentar duket se do nisë me avazin e vjetër të sherreve politike për kauza që mund të përdoren politikisht kryesisht nga opozita.
Një prej tyre është edhe kriza e pagave në sistemin e drejtësisë, që ka sjellë përplasje mes opozitës dhe mazhorancës sot (8 shtator) në Konferencën e Kryetarëve.
Kreu i grupit parlamentar të PD-së, Gazment Bardhi, ka akuzuar Kuvendin se nuk po zbaton vendimin e Gjykatës Kushtetuese, ndërsa kreu i grupit parlamentar socialist, Taulant Balla, ka deklaruar se mazhoranca e ka respektuar vendimin dhe se përcaktimi i pagave është kompetencë e Parlamentit.
Replika të forta pati mes kreut të grupit të PD dhe atij të PS.
Bardhi i është drejtuar kryetarit të Kuvendit, Niko Peleshit, duke e akuzuar për mosrespektim të Kushtetutës.
“Sot gjykatat janë në kolaps pikërisht sepse ju nuk respektoni Kushtetutën. Ka një vendim të Gjykatës Kushtetuese për pagat e gjyqtarëve dhe ju nuk merreni me atë çështje. Për ju nuk ka rëndësi Kushtetuta. Ka një vendim të Këshillit të Legjislacionit për të zbatuar vendimin e Gjykatës Kushtetuese, por ju nuk veproni. Pasojat janë se gjyqtarët janë pa paga dhe sot gjykatat janë në krizë. Përgjegjës është Kuvendi, i cili nuk respekton vendimet e Gjykatës Kushtetuese”, mësohet të ketë deklaruar Bardhi.
Më tej, ai ka shtuar:
“Ju jeni kryetari i Kuvendit, i vetmi në histori që konsideroni më të rëndësishëm zbatimin e një akti qeveritar sesa Kushtetutën. Në hierarkinë e normave ju nuk vendosni Kushtetutën e Shqipërisë, por urdhrat e Këshillit të Ministrave. Na folët këtu se si do të jetë sesioni i ri parlamentar, por ju po e nisni këtë sesion duke shkelur Kushtetutën. E mbyllët sesionin e kaluar duke shkelur Kushtetutën, tani po e nisni me shkelje kushtetuese. Do të duhej që ky Kuvend ta niste sesionin dje. Po ju nuk jeni serioz, nuk e njihni Kushtetutën”.
Nga ana tjetër, kreu i grupit parlamentar të PS-së, Taulant Balla, ka mbrojtur qëndrimin e mazhorancës, duke deklaruar se Kuvendi ka respektuar vendimin e Gjykatës Kushtetuese dhe ka ndjekur procedurat përkatëse.
“Ne kemi respektuar plotësisht vendimin e Gjykatës Kushtetuese dhe kemi ushtruar të drejtën tonë kushtetuese për të propozuar ligjin përkatës. Ky krah i Kuvendit nuk ka vënë asnjëherë në diskutim vendimet e Gjykatës Kushtetuese apo të gjykatave të tjera”, u shpreh Balla.
Ai theksoi se përcaktimi i nivelit të pagave është kompetencë e Parlamentit.
“Në botën demokratike përcaktimi i pagave është kompetencë e Parlamentit, jo e gjykatave”, deklaroi Balla.
Sipas tij, Grupi Parlamentar i PS-së ka depozituar brenda afateve projektligjin që adreson vendimin e Kushtetueses dhe kërkoi që ai të shqyrtohet sa më shpejt në komisione dhe të kalojë për miratim në seancë plenare.
Nga ana e saj, deputetja Jorida Tabaku akuzoi mazhorancën për mungesë serioziteti me procesin e integrimit evropian dhe për transformimin e parlamentit në një sipërmarrje private të pushtetit.
Tabaku kërkoi transparencë të plotë dhe ndarjen me opozitën të paketës së ligjeve që lidhen me BE-në, ndërsa paralajmëroi ekzekutivin të heqë dorë nga vendimmarrjet e njëanshme në reformat kyçe.
“Nuk mund ta trajtoni Kuvendin si pronë. Nuk mund të ketë reformë territoriale të njëanshme dhe as reformë zgjedhore të njëanshme, përndryshe ky kuvend nuk mund të quhet më kuvend i shqiptarëve,” nënvizoi Tabaku, duke kërkuar që integrimi të mos përdoret më si mburojë propagandistike.
Përplasja vjen në një kohë kur bojkoti për pagat e gushtit ka prekur administratën dhe sekretarët gjyqësorë, Dhomën Civile dhe Dhomën Penale të Gjykatës së Tiranës, si dhe administratën e Gjykatës së Apelit.
