Polonia ka inauguruar një qendër të re riparimi dhe logjistike në Czosnow, në pjesën qendrore të vendit, me mbështetjen dhe ekspertizën e Mbretërisë së Bashkuar.
Objekti synon të rrisë kapacitetet e Polonisë për mbrojtjen e hapësirës së saj ajrore dhe, njëkohësisht, të kontribuojë në sigurinë e krahut lindor të NATO-s.
Ceremonia e hapjes u zhvillua me pjesëmarrjen e ministrit britanik për Gatishmërinë dhe Industrinë e Mbrojtjes, Luke Pollard, dhe zëvendësministrit polak të Mbrojtjes, Pawel Zalewski.
Sipas Ministrisë britanike të Mbrojtjes, personeli i Mbretërisë së Bashkuar do të bashkëpunojë me kolegët polakë në qendrën e re, duke ofruar ekspertizë në mirëmbajtje, mbështetje teknike dhe trajnim.
Objekti do të luajë një rol të rëndësishëm në përshpejtimin e mirëmbajtjes dhe mbështetjes për programin PILICA+, një projekt shumë-miliardësh i Polonisë që synon krijimin e një sistemi të integruar të mbrojtjes ajrore.
Bashkëpunimi mes dy vendeve vjen në kuadër të përpjekjeve për forcimin e krahut lindor të NATO-s, në një periudhë tensionesh të shtuara me Rusinë.
“Një mbrojtje ajrore më e fuqishme e Polonisë nënkupton një mbrojtje më të fuqishme ajrore për NATO-n”, deklaroi Pollard, duke theksuar se bashkëpunimi do të sjellë përfitime edhe për industrinë dhe punësimin në të dyja vendet.
