Pas akuzave të deputetit Ben Blushi dhe reagimeve zyrtare nga Partia Socialiste lidhur me zhvillimin ose jo të garës për zgjedhjen e kryetarit, kryeministri dhe kryetari i kësaj partie, Edi Rama, e cilëson atë një debat të pakuptimtë.
Në një prononcim për Top Channel, Rama ka thënë se, modeli politik i PS është i qartë dhe vendimi i asamblesë së partisë gjithashtu.
TCH: Zoti Rama, cili është mendimi juaj, a duhet kongresi të shprehet për mbajtjen e një gare për kreun e partisë, apo duhet thjesht një rikonfirmim i mandatit tuaj?
Edi Rama: Ju më bëni këtë pyetje që të them të drejtën është një pyetje që rrjedh nga një debat krejtësisht i pakuptimtë, që ka nisur në parti dhe ka marrë dhenë. Unë mendoj që gjithçka është shumë e qartë, modeli ynë është shumë i qartë dhe besoj që asambleja dhe PS kanë marrë një vendim shumë të qartë. Megjithatë, kongresi më 19 mars do të trajtojë këtë çështje dhe do të vendosë ashtu sikundër do ta shikojë të arsyeshme.
TCH: A jeni i gatshëm të përballeni në garë me Ben Blushin dhe Eduard Ndocajn?
Edi Rama: Nuk besoj se është një çëshje që lidhet me gadishmërinë time, por besoj se është një çështje që lidhet me çfarë janë sot detyrimet e PS karshi shqiptarëve dhe ata e kanë shumë të qartë: të qeverisim dhe mos të merremi asnjë minutë me muhabete kot.
