Komisioni parlamentar i Sigurisë ka diskutuar këtë të hënë një projektligj për disa ndryshime në Kodin Penal, teksa i pranishëm në mbledhje ka qenë dhe Ministri i Drejtësisë Ylli Manjani, i cili tha se ndryshimet janë të nevojshme, pasi është absurde që një person që dënohet për armëmbajtje pa leje, të gjykohet njësoj me vite burg sa ai për terrorizëm.
““Ligji për armët, kishte absurd, pasi armëmbajtja dënohej si terrorizmi. Ka vakum në Kodin Penal për armëmbajtjen pa leje. Riformulim të nenit në frymën e vendimit të Kushtetueses. Gjithkush dënohet sipas ligjit të kohës. Nga ligji i ri përfitojnë vetëm ata që janë në proces gjykimi, jo ata që kanë një vendim të formës së prerë… Gjykata Kushtetuese na dha ne mundësi të shqyrtojmë ligjin me propocionalitet. Vepra penale e armëmbajtjes pa leje ka një vakum në Kodin Penal neni 278. Kemi pasur konsulencë me gjyqtarë penaliste dhe nga ekspertë të Ministrisë së Mbrojtjes. Gjykata Kushtetuese është shprehur për shfuqizimin e nenit 55 për bashkim matematik të dënimeve. Tani aplikohet dënimi më i rëndë i marrë, jo ai matematik. Neni 279 ka ndryshuar, për të vendosur dënimin penal në kushte më logjike”,- argumentoi Manjani.
Ndërsa Luan Rama i LSI-së tha se kjo është ndërhyrja e 17 që i bëhet këtij ligji në 3 vjet të koalicionit.
“Kjo tregon mungese serioziteti dhe vizioni, është ndërhyrja e 17 në Kodin Penal. Është shkelur parimi i propocionalitetit. Edhe dënimi për kasat fiskale dhe faturat e energjisë janë kundër këtij parimi. Mendoj se do ishte më mirë që Kodi Penal të bëhej nga e para”- tha Rama.
Spartak Braho ka shtuar se, i duhet kërkuar presidentit të Republikës falje për personat që janë dënuar sipas dispozitave të ashpra të këtij ligji.
“Kërkojini Presidentit falje dënimi për personat që janë dënuar sipas dispozitave të ashpra të këtij ligji. Nuk ka sens të qëndrojnë në burg” tha ai /java/a.k
