Një tjetër vendim i Gjykatës Kushtetuese shkakton debat në Kuvend. Kësaj here është ai për studentët e Mjekësisë në Universitetin Publik. Në Komisionin parlamentar të Ligjeve opozita e cilësoi të padrejtë “mbajtjen peng të diplomës” dhe “punën e detyruar” edhe deri në 3 vjet të mjekëve të rinj.
Por socialistët deklaruan se po zbatojnë vendimet detyruese të Gjykatës Kushtetuese. Por ky ishte një moment që opozita e shfrytëzoi për t’u treguar deputetëve socialistë se po mbajnë qëndrim me dy standarde ndaj Gjykatës Kushtetuese, institucioni që bën interpretimin final të Ligjit Themeltar të Shtetit.
Shembulli konkret sipas Enkelejd Alibeajt është rasti i mandatit të deputetes Olta Xhaçka për të cilin Parlamenti vendosi të mos zbatojë vendimin e Kushtetues, por të kërkojë opinionin e Komisionit te Venecias.
Ndërkohë, projektligji për studentët e mjekësisë, nismë e ministrisë së arsimit, pritet të kalojë për miratim këtë të enjte në Parlament. Sipas ndryshimeve të bëra, pas vendimit të Kushtetueses, studentët e vitit të parë detyrohen të punojnë jo më 5, por 3 vjet në atdhe pas studimeve, të rinjtë e viteve të dyta deri të katërta, 2 vjet, ndërsa studentët e viteve të pesta dhe të gjashta detyrohen të punojnë 1 vit pas shkollës. Socialistët kanë propozuar që këto ndryshime të hyjnë në fuqi vitin e ardhshëm akademik 2025-2026.
/a.r
