Xhani De Biazi është i pranishëm thuajse i përditshëm në median italiane. Trajneri i kombëtares kuqezi njihet si një nga komentatorët më shterrues të futbollit të fqinjit tonë të përtej Adriatikut, prej nga vjen edhe vetë, ndaj herë pas here bën “skanerin” e skuadrave apo zhvillimeve të ndryshme.
Së fundmi, De Biazi ka folur për “Tuttomercatoweb”, ku ka dhënë një intervistë të shkurtër, por ka zbuluar një “sekret” të madh: “Një klub i huaj këtë verë më ka kontaktuar, por tani kam një mision tjetër përpara: ta përdor përvojën time vetëm për Shqipërinë, që të të arrijmë një rezultat të madh.”
Lidhur me kampionatin italian, mbi pritshmëritë e sezonit të ri në Seria A, De Biazi jep mendimin e tij: “Nëse duam të ngushtojmë diferencën me ekipet e tjera në Europë, duhet bërë diçka më tepër në futbollin italian. Juventusi, përshembull, ka bërë gjëra të rëndësishme. Të përballesh me ekipe si Barcelona apo Real Madridi do të thotë se ke arritur rezultate të mëdha.”
Një nga skuadrat që po lëviz në merkaton e kësaj vere është edhe Milani. A do të rikthehet ai në majat e Seria A? De Biazi ka këtë përgjigje: “Milani nuk ka bërë asgjë për dy vite, ka nevojë për rindërtim, rigjenerim të grupit. Me Mihajloviçin do të përpiqet të bëjë një hap të rëndësishëm përpara. Të presim e të shohim.”
Interi i Roberto Mançinit e ka një shqiptar, por që luan me Zvicrën, Xherdan Shaqirin. Së fundi mori edhe një tjetër, Rei Manajn, nga Cremonese. De Biazi është i kënaqur për këtë transferim:“Rei Manajn e kemi ndjekur që kur ishte në Cremona. Ai është pjesë e Kombëtares U-19, së shpejti do të thirret në atë U-21 dhe pastaj të shohim si do të veprojmë për kombëtaren e Shqipërisë.”
Dhe natyrshëm vjen pyetja, nëse De Biazin do ta shohim ende në Shqipëri. Trajneri kuqezi nuk heziton në përgjigje: “Unë do të qëndroj te Shqipëria, me të cilën shpresoj të arrij ëndrrën europiane. Ne kemi dhe ndeshjet e fundit për të luajtur në grupin kualifikues. Ekziston një dëshirë e madhe për të fituar dhe për të shkuar në Europianin e Francës.”
Por, a ka nostalgji për ndonjë klub trajneri aktual i kombëtares shqiptare? “Kjo varet…”, – përgjigjet ish-trajneri i Torninos. Dhe kur i kërkon të shpjegohet më mirë, jo vetëm me një retiçensë, ai përgjigjet: “Një klub i huaj këtë verë më ka kontaktuar, por tani kam një mision tjetër përpara: ta përdor përvojën time vetëm për Shqipërinë, që të arrijmë një rezultat të madh”.
