Revista javore e FIFA-s “The Weekly” i ka kushtuar kopertinën futbollit shqiptar pas arritjeve historike këtë edicion të në arenën ndërkombëtare me kombëtaren në eliminatoret e ‘Euro 2016”, por edhe në nivel klubesh, pasi sigurimi i fazës së grupeve të Europa League nga Skënderbeu ishte një tjetër sukses për ekipet shqiptare në Europë, pasi askush më parë nuk kishte arritur një gjë të tillë.
Revista analizon ngjitjen e futbollit shqiptar përmes një analize të gjatë dhe intervistës me trajnerin italian që drejton kombëtaren. Revista e nis në këtë mënyrë shkrimin “Hap pas hapi, Shqipëria e drejtuar nga De Biasi arriti që të ngjitej në vendin e 25 në FIFA duke lënë pas emra si SHBA, Meksikë apo Suedi”.
Më pas, në revistën javore të FIFA-s është publikuar dhe një intervistë e trajnerit Gianni De Biasi, i cili thekson se gjëja më e vështirë gjatë punës së tij me përfaqësuesen shqiptare ishte ajo që duhet të ndryshonte mentalitetin e njerëzve.
“Nga eksperienca ime kam vënë re se futbollistët shqiptarë kanë tendencën të kënaqen me nivelin e arritur. Askush nuk është mësuar të shohë përpara dhe të vendosur objektiva më madhorë. Ajo që është më e rëndësishmja për ne është që të punojmë vazhdimisht”, shprehet De Biasi.
Tekniku deklaroi se pavarësisht problemeve që ka hasur në infrastrukturë, skuadra Kombëtare po ecën mire, kjo dhe falë punës mjaft të mirë të bërë nga Federata Shqiptare.
Për sa u përket eliminatoreve dhe shanseve që ka Kombëtarja për të shkuar në Francë, De Biasi pohoi se sigurimi i “play off”-it është një arritje shumë e madhe për Shqipërinë, pasi askush nuk e imagjinonte një gjë të tillë në fillim të këtyre kualifikueseve.
Në fokusin e gazetarëve të revistës javore të FIFA-s ishte edhe çështja e Kosovës dhe ndikimi që mund të kishte ajo në rast se federata e saj do të pranohej me të drejta të plota në FIFA. Për këtë çështje, italiani 59-vjeçar theksoi se asgjë nuk ka ndryshuar dhe se FFK nuk do të kërkojë të marrë futbollistët që tashmë luajnë me fanellën e Shqipërisë.
