Ministria e Shëndetësisë ka reaguar në lidhje me deklarimet në media të presidentit të Urdhrit të Mjekut, për masat që do të ndërmerren për mjekët që nuk kanë kryer edukimin e tyre të vazhdueshëm.
“Çdo masë ndaj mjekëve që nuk kanë kryer edukimin e tyre të vazhdueshëm, ose e kanë kryer atë në mënyrë të pamjaftueshme, është marrë dhe do të merret në zbatim të Ligjit 10 107, “Për kujdesin shëndetësor në Republikën e Shqipërisë”, të miratuar më 30/3/2009 dhe të konfirmuar edhe një herë me konsensusin e opozitës në korrik 2015”, nënvizon Ministria e Shëndetësisë.
Sipas MSH-së, vendimi nr. 295, dt. 8/7/2014, të cilit i referohet Urdhri i Mjekut në deklarimin e tij, nuk është vendim i njëanshëm i Ministrisë së Shëndetësisë, por vendim kolegjial i Bordit të Riçertifikimit dhe Akreditimit, anëtarë të të cilit janë edhe përfaqësuesit e Urdhrave të Profesionistëve të shëndetësisë.
Ndërkaq, sipas MSH-së, nenit 33 i ligjit në fjalë thotë se punësimi dhe kontratat në institucionet shëndetësore përfundojnë ose pezullohen kur stafi profesional nuk i nënshtrohet procesit të edukimit të vazhdueshëm. Rrjedhimisht, edhe vendimi për pezullimin e kontratave të punës për mjekët që nuk u çertifikuan gjatë pesëvjeçarit të shkuar është tërësisht në zbatim të ligjit.
Sakaq, Ministria e Shëndetësisë ka ftuar urdhrat e profesionistëve dhe të gjithë partnerët e saj strategjikë të bashkërendojnë punën për realizimin e objektivave të përbashkëta për përmirësimin e cilësisë së kujdesit shëndetësor dhe zbatimin e ligjeve në fuqi.
