Duke folur në një sesion virtual të Forumit Ekonomik Botëror, i mbajtur tradicionalisht në vendpushimin zviceran të skive në Davos, ai tha se perspektiva ekonomike globale mbetet e pasigurt dhe paralajmëroi që krizat e shëndetit publik mund të përsëriten në të ardhmen.

Xi, mesazhi i të cilit është i pari në forum që nga viti 2017, kur ai mbështeti tregtinë e lirë dhe globalizimin, kësaj radhe dërgoi një mesazh të ngjashëm, duke mbrojtur multilateralizmin si një mënyrë për të dalë nga sfidat aktuale.

Një ekonomi e hapur botërore

“Ne duhet të ndërtojmë një ekonomi të hapur botërore … të hedhim poshtë standardet, rregullat dhe sistemet diskriminuese dhe ekskluzive dhe të thyejmë pengesat në tregtinë, investimet dhe shkëmbimin e teknologjisë,” tha ai.

G20, një forum ndërkombëtar që bashkon 19 ekonomitë më të mëdha dhe në zhvillim të botës, si dhe Bashkimin Evropian, duhet të forcohet si një “forum i madh për qeverisjen ekonomike globale” dhe bota duhet të “koordinojë më mirë politikën makroekonomike”, shtoi ai.

Komuniteti ndërkombëtar duhet të drejtohet nga rregullat dhe konsensusi i të gjitha vendeve, jo nga një ose më shumë prej tyre që lëshojnë urdhra, tha Xi, pa përmendur ndonjë vend.

Ai paralajmëroi për një “luftë të ftohtë” të re, e cila mund të çojë vetëm në një “rrugë pa krye”.

Pa përmendur SHBA, Xi qëndroi në mbrojtje të multilateralizmit dhe globalizimit, ashtu si bëri katër vjet më parë po në Davos, pas mbërritjes së Donald Trump në Shtëpinë e Bardhë.

Më pak se një javë pasi Joe Biden u bë president i Shteteve të Bashkuara, Xi duket se ka dërguar një paralajmërim në lidhje me vazhdimin e politikës së SHBA ndaj Kinës, e cila është bërë rivali i saj numër një, veçanërisht në tregti dhe teknologji.

Regjimi komunist ka veçanërisht frikë se Biden dëshiron të bashkojë perëndimorët kundër Kinës.

“Ndërtimi i klaneve ose fillimi i një “lufte të ftohtë” të re, refuzimi, kërcënimi ose frikësimi, imponimi i ndarjes, thyerja e zinxhirëve të furnizimit ose sanksioneve për të provokuar izolimin, vetëm do ta shtyjnë botën në ndarje dhe madje edhe në konfrontim. Dhe përballja do të na çojë në një rrugë pa krye,” paralajmëroi Xi.