Konstitucionalisti Sokol Hazizaj, flet për datën e caktuar të zgjedhjeve pa konsultimin e partive politike dhe sqaron dilemën e hedhur në media nëse Presidenti i ri duhet të zgjidhet brenda këtij mandati parlamentar apo duhet të pritet që të zgjidhet nga legjislatura që del pas zgjedhjeve të 18 qershorit.
Presidenti ka caktuar datën e zgjedhjeve, mendoni se është dashur të bëjë konsultë me partitë politike para se të shpallë datën?
Presidenti i Republikës ka dy momente themelore për sa i përket caktimit të zgjedhjeve. E para lidhet me detyrimin kushtetues që ajo është e ezauruar dhe me detyrimin e parashikuar në kodin zgjedhor, i cili është 9 muaj para. Pra, parë kështu, ky dekret vjen brenda afateve kushtetuese, të cilat parashikojnë se kreu i shtetit dekreton datën e zgjedhjeve jo më vonë se 9 muaj përpara përfundimit të mandatit të legjislaturës aktuale. Në këtë pikë është në rregull. Ndërsa e dyta, për sa kohë procesi zgjedhor lidhet me subjektet politike është në detyrën dhe në rolin e presidentit për të ezauruar një seancë konsultimi me subjektet politike.
Po t’i referohemi kësaj që thoni ju, presidenti nuk ka respektuar pikën e dytë?
Është çështje e presidentit. Por normalisht, në caktimin e datës zgjedhore ka qenë rutinë e ndjekur nga Presidentët e mëparshëm dhe nuk ka pse Presidenti i Republikës të veprojë ndryshe nga paraardhësit e tij. Pra, ai duhet të përmbushë veprimet ligjore kushtetuese por duhet të përmbushë dhe kodin zgjedhor sepse sipas kodit zgjedhor është normale, morale dhe ligjore që të takohet me subjektet politike duke ditur se partitë janë pjesë e procesit zgjedhor të konkurrimit. Për këtë arsye është detyrim i Presidentit të Republikës të takohet me subjektet politike. Më parë, duhet të marrim informacion nëse Presidenti i Republikës i ka takuar apo jo partitë politike. Kush e di, mund të ketë zhvilluar konsultime me subjektet politike dhe përmes mënyrave të tjera të komunikimit. Ndoshta ka komunikuar dhe nuk është bërë mediatike. Gjithsesi detyrimet kushtetuese i ka respektuar sepse detyrimet kushtetuese prevalojnë mbi çdo gjë. Një temë tjetër që ka ndarë palët në dy qëndrime është dhe zgjedhja e Presidentit të ri.
Sipas jush duhet të bëhet brenda këtij mandati parlamentar apo duhet të lihet që të zgjidhet nga Parlamenti që pritet të dalë pas zgjedhjeve të reja?
Nuk ka rëndësi nëse zgjidhet nga Kuvendi i tanishëm apo Kuvendi i mëpastajshëm. E rëndësishme është që kur të flasim për zgjedhjen e Presidentit të ri të Republikës t’i referohemi Kushtetutës, e cila e thotë qartë se zgjedhja Presidentit lidhet me momentin kur ai ka kaluar në Kuvend. Pra parimi i mandatit të Presidentit lidhet me afatin kohor të fillimit të mandatit të tij të marrë nga Kuvendi i Shqipërisë. /shekulli
MA.ME
