Ajo që duhej të ishte një histori dashurie ka përfunduar në një histori dhune dhe frike për 21 vjeçaren nga Ukraina e cila denoncoi të dashurin e saj durrsak për dhunë fizike dhe psikologjike. Policia ka arrestuar në flagrancë 24 vjeçarin Almarjo Xhebexhia, nga Shkallnuri ndërsa vajza e cila është dhunuar dhe mbajtur e mbyllur në hotel është identifikuar me inicialet V.H. 21 vjeçe, banuese në Ukrainë”.
Si nisi aventura
Nga rrëfimi i saj në polici dy të rinjtë ishin njohur në muajin korrik në Malin e Zi teksa ndodheshin me pushime dhe më pas krijuar bashkë një lidhje dashurie “Pasi u njohëm mbajtëm kontakte, ndërruam numrat e telefonit dhe adresat e rrjeteve sociale. Më pëlqeu si djalë dhe pasi komunikonim thuajse përditë, më pas krijuam një lidhje dashurie. Më kërkoi të vija në Shqipëri dhe pasi mbërrita një ditë më parë, më dërgoi në një hotel ku më më dhunoi e më rrahu shumë rëndë” ka rrëfyer për grupin hetimor vajza nga Ukraina.
Dyshime për shfrytëzim prostitucioni
“Nuk e di arsyen pse kërkonte të qëndroja ndërkohë që nuk më ka prezantuar as me familjen”, është shprehur ajo, duke ngritur dyshime se mund të prostituohej nga 24-vjeçari.
21-vjeçarja ndodhet në spitalin e Durrësit nën kujdesin e bluzave të bardha dhe nën mbikëqyrjen e uniformave blu të qytetit bregdetar.
Mjekët deklaruan jashtë kamerave se 21-vjeçarja kishte marrë dëmtime dhe nxirje në pjesën e fytyrës.
Policia e Durrësit dyshon se ai e ka rrahur ukrainasen, me qëllim që ajo të pranonte nga ana e tij shfrytëzimin për prostitucion.
Arrestimi
Vajza ukrainase vendosi ta denonconte në polici 24-vjeçarin nga Durrësi. Almarjo Xhebexhia u arrestua në hotelin, në afërsi të Shkëmbit të Kavajës, ku ndodhej me vajzën e huaj.
Ndërkohë hetimet për zbardhjen e plotë të kësaj ngjarjeje vijojnë.
Materialet I kaluan Prokurorisë së Rrethit Gjyqësor Durrës për veprime të mëtejshme për veprat penale” Heqja e paligjshme e lirisë” dhe” Plagosja e rëndë me dashje” parashikuar në nenet 110/2 dhe 88/1 të Kodit Penal./oranews
