Dashamir Shehi, si një politikan me eksperiencë dhe njohës i mirë i proçeseve zgjedhore, që ka kaluar Shqipëria, thotë se humbja e PD në Dibër nuk është dramë, pasi një trend i tillë ku zgjedhjet e pjesshme fitohen nga mazhorancat në pushtet, është normale për vendin ton. Sipas kreut të Lëvizjes për Zhvillim Kombëtar, opozita ka çdo mundësi për tu rikthyer në pushtet, po për të arritur tek kjo kërkohët një platformë e qartë që ngjall besim te qytetarët. Duke komentuar debatet në grupin parlamentar demokrat dhe kritikat ndaj kryetarit Luzlim Bsha, Shehi thotë se në PD nuk sheh ndonjë person që mund të zëvendësojë Lulzim Bashën.
Aleati i PD, Kryetari i Lëvizjes për Zhvillim Kombëtar, Dashamir Shehi, nuk e shqetëson rezultati me të cilin opozita humbi zgjedhjet e pjesshme për Bashkinë e Dibrës.
Si njohës i mirë i zgjedhjeve, ai thotë se në vazhdimësi, betejat e pjesshme elektorale janë fituar nga mazhorancat, kështu ka ndodhur kur në pushtet ishte dhe Partia Demokratike.
Shehi: Nuk do ta bëja dramë më shumë seç është, në fund të fundit ishte vetëm një zonë edhe këtu gjithmonë kur ka qenë një zonë e vetme qeveria me të gjitha instrumentet e veta ca të mira, ca të këqija, ca të ligjshme, ca të paligjshme gjithnjë në avantazh. Kjo ka ndodhur me PS në mazhorancë, kështu ka ndodhur kur ishte edhe PD në shumicë. U bënte një zonë e vetme dhe fitonte PD. Nga kjo pikëpamje nuk kemi asgjë që ka dalë jashtë llogjikës normale.
Në një intervistë për Ora News, zoti Shehi thotë se Partia Demokratike ka para çdo mundësi për tu rikthyer në pushtet, por për ta arritur këtë sipas tij nevojitet një platformë e qartë dhe ambicioze për zgjedhjet e 2017.
Shehi: Opozita duhet të dije të bëjë një politikë tjetër, jo thjesht se doli Dibra përpara dhe po e ngarkojmë Dibrën me një gur më të madh se nuk e mban kurrizi i Dibrës. Pra duhet të kthehemi në një realitet më konkret, me teza që projektohen për 2017, me ide që janë për 2017, me njerëz për 2017 dhe nuk duhet të kthehet koka prapa, sdo bërë krahasimi i kësaj qeverie me atë tjetrën sepse do ishte një gabim i madh.
Aleati i Opozitës, Dashamir Shehi, i sheh të gabauara debatet në grupin parlamentar demokrat dhe sulmet ndaj liderit Lulzim Basha.
Shehi: Zoti Basha është një lider i ri, mund të ketë bërë edhe gabime gjatë rrugës, mund të ketë edhe mangësitë e veta, por unë nuk shoh ndonjë tjetër që e zëvendëson Bashën nga këtu deri në 2017, përveç atyre që janë nostalgjik të kohëve të vjetra./oranews
