Ajo që prej disa ditësh ishte deklaruar se shumica e parave të krimit, drogës apo korrupsionit dalin jashtë vendit, është konfirmuar tashmë edhe nga ndërkombëtarët. Si amerikanët ashtu edhe institucionet e vendeve të BE kanë një panoramë të qartë se ku pastrohen paratë e krimit dhe korrupsionit.
Byroja e Sigurisë Diplomatike, pranë Departamentit Amerikan të Shtetit, ka nxjerrë kohët e fundit raportin për krimin në Zvicër dhe aty theksohet se Shqipëria renditet mes vendeve që pastrojnë para, apo fshehin të ardhurat në bankat zvicerane. “Zvicra ende përballet me sfidën e krimit të organizuar.
Sipas publikimeve të policisë, sa i takon bashkëpunëtorëve të krimit në Zvicër, nga Evropa Juglindore veçohet Shqipëria dhe Kosova, kryesisht për trafikun e kokainës, pastrimin e parave, trafikimin e emigrantëve dhe zhvatjen e pronës”, thuhet në raport për vitin 2016, ku pas nesh vjen dhe Maqedonia.
Një deklaratë e tillë tregon edhe një herë se shqiptarët janë të shpërndarë në shumë vende të BE sa i takon pastrimit të parave apo trafikut të drogës. Edhe pse vendi ynë pak kohë më parë ka dalë nga lista e vendeve të monitorimit të pastrimit të parave duket se një pjesë e madhe e të ardhurve të vëna nga krimi apo korrupsioni shkojnë në bankat e Zvicrës, referon “SOT”.