“Ligjet ndalojnë korrupsionin e lidhur me narkotikë, por dyshimet qëndrojnë se narkotikë lëvizin përgjatë kufijve të Kosovës, ndonjëherë edhe me pranimin në heshtje nga zyrtarët”.
Kështu thuhet në raportin e Departamentit amerikan të Shtetit, lidhur me kontrollin e narkotikëve dhe kimikateve, të publikuar rishtazi. Në të theksohet se Kosova, vazhdon të mbetet një shtet transit për narkotikë që mbërrijnë në Evropë.
Raporti i publikuar i referohet vitit 2015, vit në të cilin në 9 muajt e parë, Policia e Kosovës ka konfiskuar 146 kilogramë marihuanë, që ishte dukshëm më e ulët se periudhën e njëjtë të vitit 2014, kur ishin konfiskuar 672 kg marihuanë.
Ndër faktorët që sipas raportit, thuhet se ndikojnë në tentimet për t’i luftuar narkotikët, janë mosintegrimi i plotë i katër komunave veriore, ekonomia e dobët, mosnjohja nga disa prej shteteve të rajonit dhe një sistem jo krejtësisht efektiv i menaxhimit të kufijve.
