Kamala Harris dhe Donald Trump kanë marrë një rezultat të barabartë me nga tre vota secili në qytetin e vogël në New Hampshire që ka prodhuar rezultatin e parë të ditës së zgjedhjeve.
Dixville Notch, ku ka vetëm gjashtë votues, ka një traditë që daton që nga viti 1960 për të qenë qyteti i parë që përfundon votimin dhe numërimin. Dhe votat janë ndarë 3 me 3.
Një version fizarmonikë i himnit kombëtar të SHBA-së kumboi përpara se votuesit të votonin në mesnatë.
Numërimi përfundoi 15 minuta më vonë.
Mbi 150 milionë amerikanë pritet të votojnë për presidentin e ardhshëm të SHBA-së, por do të zgjedhin edhe për pozicione lokale dhe federale. Në lojë janë 469 vende kyçe për Kongresin, i cili përbëhet nga Senati dhe Dhoma e Përfaqësuesve.
Donald Trump dhe Kamala Harris janë në një garë të ngushtë, ku ende sondazhet nuk japin një fitues të qartë.
Senati ka 100 senatorë, nga dy për çdo shtet, me mandate gjashtëvjeçare. Në këto zgjedhje janë në garë 34 vende në Senat. Dhoma e Përfaqësuesve, me 435 anëtarë të zgjedhur çdo dy vjet, është e gjitha në votim. Numri i përfaqësuesve në këtë Dhomë për çdo shtet varet nga popullsia; për shembull, Kalifornia ka 52 përfaqësues, ndërsa disa shtete më të vogla kanë vetëm një.
Kongresi ka fuqi të mëdha mbi qeverinë e SHBA-së, duke përfshirë miratimin e ligjeve, menaxhimin e fondeve dhe të drejtën për të shpallur luftë. Aktualisht, Demokratët kontrollojnë Senatin ngushtë, ndërsa Republikanët kontrollojnë Dhomën e Përfaqësuesve.
Sondazhet sugjerojnë se kontrolli mund të ndryshojë këtë javë. Republikanët kanë mbi 60% shanse për të fituar shumicën në Senat, ndërsa Demokratët kanë mbi 70% shanse për të kontrolluar Dhomën e Përfaqësuesve.
