Zbulohen detajet dhe publikohen pamjet nga operacioni i koduar “Poker”, për goditjen e veprimtarisë së kundërligjshme të lojërave të fatit zhvilluar nga shërbimet policore të Drejtorisë Vendore të Policisë Lezhë dhe ata të Komisariatit Mirditë, në bashkëpunim Forcat Speciale RENEA.
Blutë kanë vënë në pranga tre shtetas, ndërsa kanë proceduar në gjendje të lirë 23 të tjerë, ndërsa janë sekuestruar lëndë narkotike, një tavolinë pokeri, 2 kompjuterë, çipsa dhe dy aparate celular.
Burimet e Panorama thanë se të arrestuarit janë shtetasit Nikolin Prenga, pronari i lokalit, Marjo Tusha punonjës dhe Xhesjan Senaj.
Pas informacioneve të siguruara në rrugë operative se shtetasi Nikolin Prenga ushtronte aktivitetin e paligjshëm të lojërave të fatit në ambientin e lokalit të tij, shërbimet e Policisë kanë ushtruar kontroll në ambientet e këtij lokali.
Në vijim të veprimeve, specialistët e Hetimit të Krimit Ekonomik e Financiar kanë vënë në pranga shtetasit:
Nikolin Prenga., 46 vjeç, pronari i lokalit dhe Marjo Tusha, 21 vjeç, punonjës në lokal, banues në Mirditë, për veprat penale “Organizimi i lotarive të palejuara”, “Vënia në dispozicion e lokaleve për lojëra të palejuara” dhe “Përshtatja e lokalit për përdorim drogë”;
Xhesjan Senaj, 21 vjeç (klient në lokal), për veprat penale “Prodhimi dhe shitja e narkotikëve” dhe “Nxitja për përdorimin e drogës”. Këtij shtetasi, nga kontrolli i ushtruar nga shërbimet e Policisë, iu gjet një sasi e dyshuar cannabis sativa.
Gjithashtu, në vijim të veprimeve u proceduan penalisht 23 shtetas të tjerë, klientë në lokal, për veprën penale “Organizimi i lotarive të palejuara”.
Në cilësinë e provës materiale u sekuestruan lëndë narkotike e dyshuar cannabis, një tavolinë pokeri, çipsa, dy kompjuterë dhe dy aparate celular.
Materialet hetimore i kaluan Prokurorisë pranë Gjykatës së Shkallës së Parë Lezhë, për veprime të mëtejshme.
g.kosovari
