Kryebashkiaku i Durrësit, Vangjush Dako ka marrë pjesë në ceremoninë me rastin e festave të 28 dhe 29 Nëntorit, organizuar nga prefektura e Durrësit në pallatin e kulturës ‘Aleksandër Moisiu’.
Në këtë aktivitet ishin të pranishëm edhe prefekti i Durrësit Roland Xhelilaj, kryetari i Qarkut Alfred Mullaraj, përfaqësues të tjerë të pushtetit vendor, deputetë e veteranë të qytetit.
Me këtë rast ishte përgatitur edhe një koncert me motive patriotike. Fjalën e rastit e mbajti prefekti Roland Xhelilaj i cili theksoi se duke përkujtuar 28 nëntorin ne kujtojmë e nderojmë të gjithë ata që vunë mendjen, forcën dhe madje edhe jetën e tyre në funksion të shpalljes së pavarësisë.
Ndërsa 29 nëntori-vazhdoi Xhelilaj- i solli popullit shqiptar fitoren e pushtetit pas një lufte të ashpër, duke e bërë zot të vendit: “Ne të gjithë duhet të njohim dhe të nderojmë sakrificat dhe përpjekjet e shqiptarëve dhe mbi te gjitha veprën e madhe të partizanëve e sidomos te atyre që ranë në luftë.
Edhe Durrësi ka dhënë kontributin e tij me mendje, me penë, me sakrifica, me pushkë e madje edhe me jetën e bijve e bijave te tij.
Kryebashkiaku Vangjush Dako në bashkëbisedimin me veteranët theksoi se “28 Nëntori është dita kur shqiptarët dolën në skenën e historisë si një popull i pavarur me vlera e me ndërgjegje kombëtare të formuar ndërsa 29 nëntori është dita kur të rreshtuar në krah të forcave progresiste, shqiptarët demostruan trimërinë e tyre dhe dashurinë për të qenë të lirë e të pavarur”.
Jam i nderuar të deklaroj – vazhdoi Dako – që edhe Durrësi ynë ka qenë pjesë aktive e ngjarjeve që përkujtojmë sot.
Më pas prefektura e Durrësit ka shtruaj një koktejl për të pranishmit.
