Kufoma e gjetur ditën e djeshme nga një bari në Zabel të Dajtit, ka të paktën 6 muaj që ndodhet aty. Ky është konkluzioni paraprak i hetimeve, të cilët shtojnë se trupi pajetë i gjendur, është i seksit mashkull ndërsa mosha mbetet ende e papërcaktuar.
Kufoma ishte e groposur jo shumë thellë nën dhe, e kësisoj një bari i zonës e ka pikasur me sy, pasi qeni i tij po gërmonte pikërisht në atë vend.
Viktima rezulton të ketë vdekur 6 muaj më parë. “Akoma nuk kemi të konfirmuar shkaqet e vdekjes”, thotë zyrtarisht policia, por shton se “kufoma e gjinisë mashkull, ka mbi 6 muaj që ka humbur jetën”.
Policia ka nisur hetimet për identifikimin e kufomës dhe sqarimin e rrethanave të ngjarjes. Materialet i kaluan Prokurorisë, për hetime të mëtejshme.
