Kryetarja e delegacionit Shqiptar në Asamblenë Parlamentare të OSBE-së, Arta Dade, deklaroi gjatë Seancës Plenare “Helsinki+ 40” të OSBE-së që u mbajt në Helsinki, se OSBE-ja duhet të vazhdojë të luajë një rol vendimtar në situatën aktuale të sigurisë.
Pasi përshëndeti Sekretarin e Përgjithshëm të OSBE-së, Oliver Spencer dhe e falënderoi për kontributin e tij të vyer dhe profesionalizmin e treguar gjatë këtyre 24 viteve në këtë organizatë, Dade uroi Sekretarin e porsa zgjedhur, Roberto Montella.
Dade u shpreh se, “40 vjet përpara, kur ishte ende studente, ishte e paimagjinueshme se një ditë do të gjendej në këtë sallë historike ku u nënshkrua Akti Final i Helsinkit, me ata që i dhanë jetën kësaj organizate, për të diskutuar çështje shumë të rëndësishme për sigurinë dhe bashkëpunimin, paqen dhe stabilitetin në një rajon që është vendimtar për zhvillimet botërore”.
Sipas saj, “rendi i tanishëm europian, ndërtuar me kujdes pas përfundimit të Luftës së Ftohtë, është duke përjetuar një ndryshim të rrezikshëm të paradigmës, pasojat e të cilit janë të vështira për t’u parashikuar në afat të gjatë. Mosbesim dhe ndarje, politika konfrontuese dhe logjika e lojës me shumë zero po mbizotërojnë mbi qasjen bashkëpunuese ndaj sigurisë që është në zemër të angazhimeve gjithëpërfshirëse të OSBE-së dhe parimeve që shtetet e saj pjesëmarrëse kanë nënshkruar lirisht”.
“OSBE-ja duhet të vazhdojë të luajë një rol vendimtar në situatën aktuale të sigurisë. Si organizata e parë ndërkombëtare që iu përgjigj krizës në Ukrainë, OSBE-ja ka demostruar aftësinë për të përmbushur përgjegjësitë e saj në kuadrin rajonal në bazë të kreut VIII të Kartës së OKB-së”, tha Dade.
“OSBE-ja ka gjetur konsensus për shumë iniciativa kryesore mbi konfliktin në dhe rreth Ukrainës. Lançimi i projektit kombëtar të dialogut në Ukrainë, vendosja e Misionit të Posaçëm të Monitorimit dhe Misionit të Vëzhgimit, dhe pjesëmarrja në Grupin Trilateral të kontaktit, janë shembulli më i dukshëm i aftësisë së OSBE-së për të nisur veprime kolektive edhe gjatë një krize shumë përçarëse”, theksoi Dade.
“Këto demonstrojnë edhe një herë pikat e forta e të qëndrueshme dhe avantazhet e OSBE-së si një nga platformat më të mira për të kapërcyer ndarjen në rritje midis Lindjes e Perëndimit dhe lehtësuar zgjidhje bashkëpunimi në Europë. Ajo ka rikonfirmuar në mënyrë të qartë rëndësinë e vazhdueshme për Sigurinë Europiane”, u shpreh Dade.
Dade theksoi se, “OSBE-ja duhet të mbetet forumi kryesor evropian për dialog politik, vendi kryesor për të diskutuar në mënyrë të hapur e transparente shqetësimet e tyre kryesore të sigurisë. Megjithatë, rindërtimi i besimit nuk mund të arrihet në dëm të angazhimeve tona themelore dhe të parimeve të Aktit Final të Helsinkit”. “Procesi i integrimit rajonal në zonën e OSBE-së – i realizuar në përputhje me parimin që njeh të drejtën e shteteve sovrane për të krijuar lirisht aleanca dhe për të qenë pjesë e grupeve të ndryshme politike dhe ekonomike, duhet të shihet si një kontribut konkret në realizimin e objektivave të përcaktuara nga dokumentet themelore”, tha Dade.
Sipas saj, “dimensioni njerëzor duhet të mbetet në thelb të konceptit gjithëpërfshirës të sigurisë të OSBE-së, duke qenë se hendeku midis angazhimeve përkundrejt dimensionit njerëzor dhe zbatimit të tyre vjen duke u rritur roli i Asamblesë Parlamentare të OSBE-së merr rëndësi edhe më të madhe”.
