Nga berberët e parukierët te trajnerët e jogës, apo instruktorët personalë në palestra… Drejtoria e Përgjithshme e Tatimeve ka caktuar paga referuese për secilën nga këto kategori profesionesh. Kështu, një berber nuk mund të deklarojë më pak se 75 mijë lekë pagë në muaj. Po aq edhe një parukiere. Për estetistët, kozmetistët dhe “make-up artist” paga referuese është 80 mijë lekë. Po aq për instruktorët në aerobi apo kërcim. Për instruktorët personalë në palestër është caktuar paga 120 mijë lekë në muaj.
“Kjo listë do të shërbejë si një instrument referues për analizën e riskut, me qëllim identifikimin e rasteve të mundshme të mosdeklarimit të pagave reale të punonjësve. Në këtë kuadër, Administrata Tatimore do të analizojë të dhënat e deklaruara në listëpagesat e subjekteve që operojnë në këto sektorë, duke i krahasuar ato me nivelet indikative të pagave sipas profesioneve përkatëse”, thuhet në njoftimin e Administratës Tatimore.
Në mjekësi, pagat dysheme variojnë nga 80 mijë lekë për profilet mbështetëse deri në 215 mijë lekë për profesionet më të specializuara si kirurgjitë e avancuara dhe anesteziologjia. Specialitete si kardiologjia, neurologjia apo gastroenterologjia vendosen rreth 200 mijë lekë, ndërsa një mjek i përgjithshëm llogaritet me 163 mijë lekë.
“Tatimpaguesit që deklarojnë paga nën nivelin e pagave indikative për profesionet përkatëse, apo që ndryshojnë kategorizimin e profesionit të punonjësit me qëllim deklarimin e një page më të ulët, do të konsiderohen me risk dhe do të jenë objekt verifikimi nga strukturat e specializuara të Administratës Tatimore”, vijon njoftimi.
Në fund të marsit, drejtori i Përgjithshëm i Tatimeve, Ilir Binaj, bëri të ditur se nisjen e kontrolleve të cilat do të përfshijnë rreth 10 mijë tatimpagues dhe afro 45 mijë të punësuar në këto sektorë.
