Lunaçek i dridh serbët seriozisht. Shefi i diplomacisë serbe Ivica Daçiç ka vlerësuar se deklarata e nënkryetares së Parlamentit Evropian Ulrike Lunaçek se trashëgimia kulturore serbe do të ruhet më mirë nëse Kosova bëhet anëtare e UNESCO-s, është “argument i rremë i atyre që e shtyjnë Kosovën në UNESCO”. Duke komentuar deklaratën e Lunaçekut, Daçiç për gazetën e Beogradit “Danas” ka bërë pyetjen “pse deri më tash trashëgimia fetare kulturore serbe nuk ka qenë e ruajtur mirë”.
“Pse deri më tash trashëgimia fetare kulturore serbe nuk është ruajtur mirë, por Kosova në prani të bashkësisë ndërkombëtare ka shkatërruar dhe ka dëmtuar më shumë se 200 kisha, manastire dhe objekte të tjera fetare, më shumë se dhjetë mijë ikona janë marrë, janë vjedhur, po shkatërrohen madje edhe mbishkrimet në varre.
Dhe ne duhet të besojmë se mbrojtja do të jetë më e mirë e në të njëjtën kohë po botohen kalendarë fetarë në të cilët kishat dhe manastiret tona po shënohen si shqiptarë”, ka thënë Daçiç, transmeton Koha.net.
Ulrike Lunaçek në intervistën për një portal në gjuhën serbe ka thënë se lobimi i Serbisë kundër Kosovës flet se Serbia nuk dëshiron ta mbrojë trashëgiminë e vet, të cilën në të vërtetë e bën UNESCO”.
