Në një lidhje të drejtëpërdrejtë me emisionin “Java në RTSH”, ministry fuqiplotë për emergjencën pas tërmetit solli shifrat më të fundit nga terreni.
Bledi Çuçi tha mbrëmjen e së premtes se bëhet fjalë për 13 mijë banorë të strehuar në hotele, çadra dhe qendra sociale pas dëmtimeve të banesave nga tërmeti. Por sipas ministrit, shifra është edhe më e lartë duke marrë parasysh ata qytetarë që janë strehuar tek të afërmit e tyre.
Çuçi tha se situata është plotësisht nën kontroll dhe ky është mendimi edhe i ekspertëve të huaj që po asistojnë në verifikimin e objekteve të dëmtuara.
“Sfida për ne mbetet ende verifikimi i dëmeve. Duhet të dimë se Shqipëria nuk ka qenë e përgatitur për një situatë të tillë. Nga bisedat me drejtuesit e ekspertëve të huaj mësuam se edhe vende të tjera nuk kanë pasur përgatitjen që ne shohim sot derisa janë prekur nga fatkeqësi të tilla dhe janë detyruar të krijojnë grupet e specialistëve në rast fatkeqësish. Të gjitha forcat shqiptare që u angazhuan momentet e para për shpëtimin e jetëve dhe inxhinerët e angazhuar më pas për dëmet kanë qenë ekselentë” – tha ai.
Ministri shtoi se i mbetet shtetit shqiptar që të krijojë grupet e emergjencës për rast tërmetesh pas ngjarjes së hidhur që mori jetën e 51 qytetarëve.
Çuçi u shpreh për “Java në RTSH” se është herët për të folur me shifra monetare sa i përket dëmeve që shkaktoi tërmeti i 26 nëntorit.
Ai përsëriti apelin për institucionet e drejtësisë që të vënë para përgjegjësisë autorët e ndërtimeve problematike.
