Drejtoresha e Inteligjencës Kombëtare në SHBA, Tulsi Gabbard, ka publikuar dokumente të reja sekrete mbi origjinën e virusit Covid-19.
Sipas saj, këto materiale zbulojnë lidhje të forta mes kërkimeve të financuara nga Amerika dhe Institutit të Virologjisë në Wuhan.
Përmes një deklarate të fortë, Gabbard theksoi se pas vitesh gënjeshtrash dhe censure, populli amerikan tashmë meriton transparencë dhe llogaridhënie për dhimbjen që kaloi.
Zyra e Inteligjencës sqaroi se dosja përmban komunikime të brendshme dhe dëshmi nga sinjalizuesit që përfshijnë ish-zyrtarin e lartë të shëndetësisë, Anthony Fauci. Madje, Gabbard shkoi më tej duke akuzuar hapur Faucin se ka gënjyer nën betim para Kongresit Amerikan gjatë vitit 2024.
Sipas dokumenteve, ai dyshohet se ka mbikëqyrur financimet për kërkimet mbi koronaviruset e lakuriqëve të natës në laboratorin kinez.
Nga ana tjetër, vetë Fauci i ka mohuar prerë këto akuza duke i quajtur ato plotësisht absurde. Ai ka sqaruar se si origjina natyrore, ashtu edhe një aksident i mundshëm laboratorik, mbeten pista të hapura, ndonëse ai beson te versioni natyror.
Sakaq, agjencitë amerikane të inteligjencës ende nuk kanë dalë në një përfundim zyrtar dhe dokumentet e reja nuk janë verifikuar në mënyrë të pavarur. Kujtojmë se Covid-19 u identifikua për herë të parë në Wuhan në fund të vitit dymijë e nëntëmbëdhjetë, duke shkaktuar miliona viktima dhe një krizë të paprecedentë globale.
