Gazeta e përditshme italiane “Corriere della sera” ka publikuar sot në faqet e saj një analizë mbi rolin dhe figurën e shqiptarit Bledar Ibrahimi, i dëbuar nga Italia në 3 mars të 2016 me akuzën e përkrahjes së propagandës terroriste të Shtetit Islamik (ISIS) në Itali.
Nën titullin “Udhëtimi i Bledar “profesorit”. Studimet në Kajro e rrjeti i xhihadistëve”, ky atikull zbardh lidhjet e kontaktet e Bledar Ibrahimit me një sërë ndjekësish e aspiratësh luftëtarë të ISIS në territorin italian e në veçanti në rajonin e Lombardisë.
Bledar Ibrahimi ka mbërritur nga Shqipëria në moshën 20-vjeçare, duke u vendosur rastësisht në komunën e Pozzo D’ Adda në Lombardi.
E pikërisht në këtë qytezë me 6 mijë banorë e në kufi me provincën e Bergamos, Bledar Ibrahimi lindi për herë të dytë, duke mohuar origjinën e tij, tokën e tij dhe duke u betuar në emër të Allahut e të ushtrisë së Kalifatit.
Islami fondamentalist e shushati me anë të propagandës në internet.
Bledari ndërroi emër e profilin në Facebook, duke u quajtur Yahya Ibrahimi.
Në postimet në Facebook ai shkruante se “Siria e Iraku janë për të gjithë myslimanët”, kërkonte mbrojtjen e Allahut për kalifin e Bagdadit, liderin e besimtarëve, shpërdau fjalët e al-Zarqawi kundër Perëndimit, më 6 maj 2014 dhe ka kërkuar ndihmën hyjnore të Allahut me anë të një fotografie që nxiste xhihadin.
Bledar Ibrahimi kishte lidhur miqësi me një pjesë të mirë të mbështetësve të ISIS në Lombardi, si me Giulia Maria Sergio (lady xhihad italiane e martuar me shqiptarin Aldo Kubozi), me pakistanezin e sapo dëbuar nga Italia për terrorizëm, Aftab Farooq, me shqiptarin Idriz Elvis Elezi, me torinezin Halili El Mahdi, autori i dokumentit të parë të ISIS në gjuhën italiane, ka krijuar lidhje me të afërmit e luftëtarit të ISIS nga provincia e Vareses, Oussama Khachia, si dhe janë dokumentuar biseda të tij online me Brahim Boufares, një tjetër mbështetës i ISIS, i dëbuar nga Savona me akuzën e terrorizmit.
“Emri i Bledar Ibrahimit është më kryesori e më i rëndësishmi në hetimet e antiterrorizmit italian”, shkruan Corriere della Sera.
Forcat speciale të Milanos e larguan nga shtëpia ku jetonte në komunën Pozzo D’Adda dhe e dëbuan në Elbasan, ku jeton me gjyshin e tij.
Ai e ka të ndaluar të hyjë në territorin e Bashkimit Europian për 10 vitet e ardhshme.
Roli i Bledar Ibrahimit po shfaqet me qartësi vetëm tani.
Pasi autoritetet italiane kanë rindërtuar çdo pjesë të “ushtrisë së xhihadistëve në Lombardi”, janë zbardhur të gjitha kontaktet telematike e telefonike mes personave të arrestuar, të dëbuar e luftëtarë të ISIS.
Është kristalizuar roli “superior” i Bledar Ibrahimit.
Ai është një mbështetës i Shtetit Islamik që nuk synon vetëm të niset në Siri e t’i bashkohet luftës së Kalifatit.
“Profesori kishte nisur karrierën e studimeve fetare të çertifikuara në Egjipt për ‘u bërë një imam radikal.
Dy vjet më parë ishte transferuar në Kajro për të studiuar në një Universitet arab e për të mësuar bazat e fesë myslimane në një shkollë Kurani.
Në të njëjtën periudhë në Egjipt ka jetuar dhe motra e tij Rexhina, 20-vjeç e bashkëshorti i saj italian nga Lombardia, i konvertuar në mysliman me emrin Icaro Bilal Masseroli.
Motra e burri i motrës së Bledar Ibrahimit janë dëbuar nga Egjipti të akuzuar për fondamentalizëm.
Në fund të muajti shkurt të 2016, Bledar Ibrahimi rikthehet nga Egjipti në Itali, duke kaluar përmes Frankfurtit, ku qëndron dy ditë e më pas udhëton për 8 orë me autobus drejt Milanos.
Ende nuk ka qartësi pse Bledar Ibrahimi nuk zgjodhi një fluturim direkt nga Egjipti drejt Italisë.
I sapo kthyer në vendin e rezidencës së tij në komunën Pozzo D’Adda, Bledar Ibrahimi ka kërkuar një kartë të re identiteti, dhe pse ajo që zotëronte nuk i kishte skaduar ende.
Në kartën e vjetër të identitit, Bledar Ibrahimi shfaqet me mjekër të gjatë, ndërsa në momentin që ka kërkuar një kartë të re identitet është prezantuar pa mjekër.
Tema/d.i.
