Presidenti i CONCACAF, Victor Montagliani, i ka kërkuar presidentit të FIFA-s, Gianni Infantino, të mos marrë pjesë në një turne futbolli për të rinj në Republikën Dominikane këtë fundjavë, duke argumentuar se prania e tij do ta errësonte ngjarjen mes kritikave në rritje ndaj lidershipit.
Infantino po përballet me presion nga tre konfederata për të dhënë dorëheqjen, përfshirë UEFA-n, AFC- në e Azisë dhe CONCACAF-in, e cila përfaqëson Amerikën e Veriut dhe Qendrore dhe Karaibet, pas përpjekjes së tij të dështuar për të shitur një pjesë të Kupës së Botës.
Presidenti i FIFA-s, i cili mund të përballet me një mocion censure nga organet drejtuese të futbollit botëror, ndodhet në Republikën Dominikane këtë fundjavë dhe thuhet se planifikonte të merrte pjesë në një aktivitet të organizuar nga Unioni i Futbollit të Karaibeve (CFU).
Në një letër dërguar Infantinos të premten (21/8) dhe të parë nga Reuters, Montagliani përmendi “krizën e qeverisjes që rrethon FIFA-n” dhe i kërkoi presidentit të konfederatës botërore të futbollit të rishqyrtojë pjesëmarrjen e tij në Serinë CFU U-14.
“Siç ndoshta jeni në dijeni, prania juaj e propozuar ka tërhequr interes të konsiderueshëm mediatik”, shkroi Montagliani, i cili është gjithashtu nënkryetar i Këshillit të FIFA-s.
“…media do të përqendrohet në këtë situatë, e cila për fat të keq do të shkëpusë ndjeshëm vëmendjen nga natyra konkurruese e ngjarjes rinore të CFU-së. Prandaj, ju kërkoj me respekt, në emër të futbollit, të rishqyrtoni praninë tuaj, pasi për fat të keq do të dëmtojë natyrën sportive të këtij veprimi të rëndësishëm për zhvillimin e futbollit në një moshë të re”.
Reuters kontaktoi FIFA-n për koment mbi letrën. Infantino mbërriti në Punta Cana, ku u prit nga Ministri i Sportit dhe Rekreacionit i Republikës Dominikane, Kelvin Cruz.
“Ne e vlerësojmë thellësisht vizitën tuaj në Republikën Dominikane. Nuk ka dyshim se prania juaj në vendin tonë e vendos futbollin tonë në hartën ndërkombëtare dhe hap perspektiva të mëdha për zhvillimin dhe evolucionin e tij”, tha Cruz.
Presidenti i FIFA-s u prit gjithashtu nga presidenti i Federatës së Futbollit të Republikës Dominikane, José Deschamps, komisioneri kombëtar i futbollit, Benny Metz, dhe presidenti i Komitetit Olimpik, Garibaldi Bautista Lorenzo.
Infantino po kërkon një mandat të katërt deri në vitin 2031, por disa federata kombëtare dhe zyrtarë me ndikim tani kanë tërhequr mbështetjen e tyre për figurën zvicerane.
