Klubi arab Al-Hilal vijon merkaton me marshin e pestë në Europë, teksa përveç Milikonviç-Saviç që pritet t’ia rrëmbejë Lazios për 40 milionë euro, dëshiron të marrë në Riyadh edhe Nicolò Zaniolo.
Sulmuesi i kombëtares italiane është profili i ri që ka përfunduar në radarin e klubi nga Saudi Pro League dhe sipas mediave turke propozimi i është dorëzuar tashmë lojtarit të Galatasaray-t.
Ky propozim është një ndër më të rëndësishmit pasi Zaniolo do të fitonte 120 milionë euro në 4 vite, ose 30 milionë në sezon.
Shifra marramendëse po e bën Zaniolo-n të lëkundet, por Al-Hilal i ka dhënë 15 ditë kohë për të vendosur.
Ndërkohë, vetë Galatasaray nuk do të ishte problem për klubin arab, i cili do të paguante klauzolën e lirimit prej 35 milionë euro për yllin italian.
Edhe Roma po e shikon me kujdes situatën, pasi përfiton një përqindje nga rishitja, e cila përkthehet në rreth 4 milionë euro për klubin verdhekuq.
/a.r
