Filmi “Babai” me regji të Visar Morinës do të shfaqet në festivalin ndërkombëtar të filmit “Cleveland International Film Festival 2016”, transmeton Koha.net.
Për filmin shqiptar , i cili do të shfaqet më 5 dhe 6 prill, gazeta ‘Cleveland.com shkruan se “është një moment që ta thyen zemrën në film, kur një djalë i ri e shikon, nga kampi i refugjatëve, babanë e tij duke u larguar dhe shpreson që të kthehet për të.
Por, një gjë e tillë nuk ndodh. Kjo, mbi të gjitha tregon për një baba, i cili e braktisë fëmijën e tij në Kosovë, dhe e lë 10 vjeçarin me axhën e tij, i cili është i dhunshëm edhe ndaj fëmijëve të tij. Një baba që gjithnjë e largon të birin dhe e largon edhe në stacionin e autobusëve”.
Më tutje Cleveland.com shkruan se, “megjithatë, kjo nuk e ndal 10 vjeçarin Nori, rolin e të cilin e luan Val Maloku, që ta ndjek babanë e tij deri në Gjermani.
Ai vjedh paratë e dasmës së një kushëriri dhe fillon udhëtimin e tij për në Evropë, në kërkim të babait të tij.
Ndonëse ngjarja zhvillohet në vitet e ’90-ta, para krizës aktuale me refugjatë, shikuesit s’kanë se si të mos mendojnë për fëmijët që i shohim në lajme duke e rrezikuar jetën e tyre për të bërë një udhëtim të tillë sot”.
“Nori nuk mund t’i ikë luftës, por varfëria e zymtë që ai dhe babai i tij e lënë pas në pluhur, në fshatin e pashpresë, me qentë dhe banorët e lodhur është po aq tragjike”, shkruan më tutje e përditshmja amerikane, transmeton Koha.net.
“Braktisja nga ana e babait të tij është dëshmi se sa i dëshpëruar mund të jetë një burrë për lirinë dhe mundësinë. Ndërsa udhëtimi i rrezikshëm i Norit është dëshmi se sa një djalë mund ta dojë babanë e tij, madje edhe një që e largon”, shkruan Cleveland.com.
Cleavland.com i ka dhënë notën “A” filmit “Babai”.
