Edicioni 2018-2019 i Premier League do të ulë sot pasdite siparin me ndeshjet e javës së 38-të që do të luhen të gjitha në orën 16:00. Janë zgjidhur pothuajse të gjitha dilemat në këtë sezon që ka rezultuar vërtet spektakolar me përjashtim të asaj më të rëndësishmes, titullit kampion. Vëmendja e të gjithë edhe në javën e fundit do të jetë te dueli në distancë për vendin e parë mes Manchester City-it dhe Liverpoolit. Citiziens të cilët vinë pas një ecurie fantastike prej plot 13 fitoresh rradhazi do të sfidojnë sot në transfertë Brightonin në një ndeshje ku u duhet me çdo kusht fitorja për të ruajtur avantazhin prej 1 pike ndaj Liverpoolit.
The Reds nga ana e tyre pasi siguruan finalen e Champions League pas asaj përmbysjeje spektakolare ndaj Barçës, presin në shtëpi Wolverhampton, skuadrën që konsiderohet edhe si vrasësja e të mëdhave në këtë sezon. Edhe Liverpooli ka zhvilluar një kampionat rekordesh pasi nëse fiton sot arrin kuotën e 97 pikëve, por në fund mund të ngelet duarbosh nëse fiton City. Fakti që skuadra e Klopp nuk menaxhoi dot 7 pikë avantazh ndaj formacionit të Guardiolës është një tregues se City e meriton pak më shumë se Liverpooli titullin, gjithsesi të dyja skuadrat kanë zhvilluar një sezon për t’u vendosur në kornizë. Në Angli nuk toleron askush prandaj edhe sot edhe pse luajnë përballë dy skuadrave pa objektiva realë në këtë javë të fundit, Citiziens dhe The Reds duhet të derdhin djersë në fushë për ta mbyllur kampionatin me fitore. Të dyja sfidat e dy rivalëve për titull do të keni mundësi t’i ndiqni live në Supersport në orën 16:00./i.h
