Nëse Basha mendon se me Ervin Salianjin apo Grida Dumën, Enno Bodon, Enkelejd Alibeajn apo Genc Pollon, do të mund të mbledhë vota dhe të fitojë zgjedhjet e ardhshme parlamentare, dështimin e ka pothuajse të sigurtë. Kreu demokrat duhet t’i bëjë të qartë qytetarëve që cili është ekipi i tij.
Nëse ai ka zgjedhur si pjesë të ekipit Ervin Salianjin kjo është çështje e tij, por ne nuk mund të mos themi që ai është një humbës në garën për kreun e FRPD-së, një humbës të cilin të rinjtë demokratë e nxorën nga dera, por me një urdhër, ai emërohet në krye të Aksionit Qytetar.
Grida Duma nuk ka asnjë gjë të keqe që të bëjë pjesë në stafin e Bashës, por ne nuk mund të mos e themi se rezultati që ajo mori në zgjedhjet e fundit lokale në Durrës, ishte ndër më zhgënjyesit që kjo forcë politike ka pasur që prej themelimit të saj.
Nëse pjesë e ekipit Basha është Enno Bozdo, sërisht kjo është një zgjedhje e kreut të PD-së, por ne nuk mund të mos i kujtojmë të paktën skenën e fundit të krijuar në Durrës, ku sekretari Organizativ i partisë më të madhe në opozitës, shkon dhe ndërron bravat e dyerve, sikur selinë ta kishte pronë të tij. Dhe për më tepër ka krijuar një kaos total në një nga degët kryesore të PD-së.
Enkelejd Aliebaj humbi garën për Këshillin Kombëtar të PD-së, humbi zgjedhjet në Fier kur kandidonte për Bashkinë e këtij qyteti me një rezultat të thellë, krijoi përplasjet mes strukturave të degëve të kësaj partie, ndërsa u emërua në krye të Departamentit të Rendit dhe Sigurisë, pa u votuar nga Këshilli Kombëtar, sikundër përcaktohet në statut.
Gjatë qeverisjes së PD-së, Alibeaj u largua nga posti i ministrit të Drejtësisë dhe nuk u kandidua për deputet, ndërsa tentoi postin e Sekretarit të Përgjithshëm të kësaj partie ku humbi përballë Arben Ristanit.
Nëse Genc Pollo është pjesë e ekipit Basha, kjo është zgjedhje e tij ose e të dyve. Por ne nuk mund të mos e themi se ai është në ikje, ndoshta në pritje për të sulmuar pas krahëve, kryesesin e ekipit. Pavarësisht se kush do të jetë ekipi i Bashës, a përfshihen apo jo këto emra, kreu demokrat ka një detyrim moral para çdo shqiptari që do t’i kërkojë votën në mbështetje të PD-së, që t’i bëjë të njohur ekipin e tij. Nëse nuk e ka një ekip, atëherë ka ende edhe pak kohë për ta krijuar.
Citynews
ma.me
