Moti i ftohtë bëhet shkaktar i tri vdekjeve në Sarandë, Gjirokastër e Vlorë.
Oficeri i Portit të Sarandës, Shezo Telo, u gjet i ngrirë në afërsi të shtëpisë, pasi për shkak të problemeve me zemrën ai kishte mbetur në rrugë.
Tentativa për t’u ngrohur me qymyr mori jetën e 55- vjeçarit Panajot Lasko në Gjirokastër, ndërsa një i moshuar në Vlorë gjeti vdekjen pasi u rrëzua në akull, raporton “Panorama”.
GJIROKASTER
Panajot Lasko, 55 vjeç, nga fshati Kakoz i Lunxhërisë, humbi jetën nga asfiksia. Në prag të vdekjes është edhe babai i tij, Arqile Lasko, 75 vjeç, i cili ndodhet në gjendje të rëndë në spital.
Sipas Policisë, babë e bir janë asfiksuar nga çlirimi i gazit karbonik të qymyrit. Ata jetonin të vetëm në një banesë dykatëshe, ku kati i dytë kishte dalë nga funksioni për shkak të amortizimit dhe përdorej vetëm kati përdhes. Banorë të fshatit bënë të ditur se viktima kishte disa ditë i sëmurë me grip dhe për të kujdesej vetëm babai.
I moshuari jetonte me një pension fshati dhe mbante edhe të birin, i divorcuar dhe i papunë. Të afërm të viktimës thanë se ai ishte prekur nga gripi me temperaturë të lartë prej datës 1 janar dhe trajtohej vetëm me çaj dhe paracetamol, pasi nuk kishin mundësi financiare për të marrë ilaçe.
Ai ka kaluar në hipotermi ditët e fundit, si pasojë e ftohjes. Mungesa e druve për shkak të izolimit të fshatit nga bora, ka bërë që ata të përdornin qymyrguri. Ky lloj qymyri është kategorikisht i papërdorshëm në ambiente familjare apo dhe në vatra zjarri për shkak të prezencës së lëndëve helmuese që çlirojnë gazra të rrezikshëm për jetën.
Dyshohet se vdekja e 55- vjeçarit ka ardhur krejtësisht pa u kuptuar, bazuar edhe nga provat në vendin e ngjarjes. Ai është gjetur mbuluar me një rrobë të trashë e sipër saj me një pelerinë të madhe, çka vërteton se humbja e jetës ka ndodhur në gjumë.
Ndërkohë që babai i tij, Arqilea, është gjetur me shenja të pakta jete, me puls të dobët dhe me fytyrë të nxirë.
“Të dy, babë e bir, kanë qenë të nxirë nga fytyra me shenja karboni nëpër vetulla, flokë dhe pjesët e frymëmarrjes”, bënë të ditur burime nga spitali.
SARANDE
Një oficer në Sarandë u gjet i vdekur në afërsi të shtëpisë së tij, ndërsa shkak, veç problemeve me zemrën, dyshohet të jetë bërë edhe moti me ngricë. Policia bëri të ditur se Shezo Telo, 51 vjeç, është gjetur dje nga djali i tij pak metra larg banesës, ndërsa sipas të dhënave nga mjekët e Sarandës, viktima ka qenë krejtësisht i ngrirë.
Viktima e gjetur në Sarandë, Shezo Tole
Ngjarja ndodhi rreth orës 09:00, në lagjen nr.4, në hyrje të banesës private me dy kate të të ndjerit. Mjekët konstatuan se 51-vjeçari kishte ndërruar jetë të paktën 4-5 orë më parë.
Nga të dhënat e ekspertëve të Mjekësisë Ligjore, 51-vjeçari është gjetur në një pozicion ulur, me duart para gjoksit, sikur kërkonte ndihmë. Trupi ishte tërësisht i ngrirë dhe i mavijosur në fytyrë.
Dyshohet se krahas shqetësimit që mund të ketë pasur në zemër, ka ndikuar edhe i ftohti duke i marrë jetën. Sipas të dhënave, viktima ka qenë duke u kthyer në banesë i vetëm pasi kishte marrë pjesë në ceremoninë mortore të vjehrrit të tij. Për këtë shkak dyshohet se në banesë nuk ka pasur asnjëri dhe në një moment ai është ndier keq. Por nuk ka mundur të shkojë më tej, ndërsa i biri e ka gjetur trupin vetëm të nesërmen.
Prej 23 vitesh, viktima punonte si inspektor kapitanerie në Port. Ai ishte baba i dy fëmijëve, një djali dhe një vajze. Ndërkaq, i ftohti shënon viktimë edhe në Vlorë. Ditën e djeshme, rreth orës 10:00, në fshatin Panaja ka gjetur vdekjen shtetasi Tasim Llane.
Sipas informacioneve nga Policia, 81-vjeçari është rrëzuar në oborrin e shtëpisë si pasojë e ngricave. Ai ka marrë dëmtime të shumta në trup dhe kokë. Familjarët e kanë dërguar për në spitalin e Vlorës, por ka ndërruar jetë gjatë rrugës. /b.d
