Rusia po përgatit sulme të reja me dronë në Evropë, por këtë herë ato do të synojnë vendet e Mesdheut. Një raport i fundit i inteligjencës amerikane ka zbuluar se nuk bëhet fjalë më në vendet e NATO-s me të cilat i ndan një kufi, si Polonia dhe Finlanda, por në zonën e Mesdheut, veçanërisht kundër Spanjës, Francës dhe Italisë. Sipas CIA-s, ky është një nga planet kryesore të përshkallëzimit të Kremlinit, një mënyrë për të ushtruar presion mbi Perëndimin, siç Moska ka premtuar vazhdimisht, “të ndëshkojë Evropën për mbështetjen e saj për Kievin”.
Sipas “El Mundo”, inteligjenca amerikane ka hartuar një dokument mbi mundësinë e përshkallëzimit rus pas vizitës së papritur të drejtorit të CIA-s, John Ratcliffe, në Moskë më 25 gusht. Kreu i shërbimit të inteligjencës amerikane thuhet se e paralajmëroi Rusinë të shmangte çdo sulm apo provokim të hapur kundër NATO-s. Këto fjalë duket se kanë rënë në vesh të shurdhër, duke pasur parasysh se në javët e fundit, nga sabotimi te sulmet e dështuara në Leipzig e deri te kalimet e vazhdueshme kufitare të avionëve luftarakë dhe mjeteve ajrore pa pilot, një sërë incidentesh duket se po ndodhin me një ritëm të paparë.
Vëmendja e Kremlinit mund të zhvendoset së shpejti nga rajoni i Balltikut në Mesdhe. Sipas El Mundo, CIA ka informuar tashmë qeveritë e Francës, Spanjës dhe Italisë për kërcënimin konkret që po vjen. Sipas informacioneve të mbledhura nga agjencitë amerikane të inteligjencës, Moska po përgatit sulme dhe operacione ngacmimi me dronë Gerbera. Këta avionë pa pilot, për shkak të madhësisë së tyre të vogël dhe rrezes së fluturimit deri në 600 kilometra, mund të fshihen lehtësisht në kontejnerë nga ushtria ruse dhe të lëshohen nga kuverta e një anijeje në Mesdhe.
“Nuk është aspak e vështirë”, shpjegoi një burim pranë Ministrisë së Mbrojtjes lituaneze për gazetën spanjolle.
Nëse Gerberat do të lëshoheshin 200 ose 300 kilometra larg bregdetit evropian, atyre do t’u duheshin maksimumi dy orë për të arritur në tokë. Impakti nuk do të ishte shkatërrues duke pasur parasysh sasinë e vogël të eksplozivëve që mund të mbajnë këto dronë. Por shpërthime të tilla, përveç shkaktimit të dëmeve të konsiderueshme në struktura dhe njerëz që mund të preken, do të kishin kryesisht një ndikim politik dhe ekonomik. Shpërthimet simbolike, mund të thuhet, synojnë alarmimin e popullatave të kombeve të prekura dhe rritjen e brishtësisë politike.
Por pse Italia, Spanja dhe Franca? Ato janë tre vendet kryesore evropiane që do të kenë në zgjedhje në vitin 2027. Prandaj, lëshimi i dronëve do të ishte një vazhdim i strategjisë së tensionit që është tashmë në zhvillim e sipër në frontin lindor të NATO-s, i cili është gjithnjë e më shumë nën presion për shkak të sulmeve të vazhdueshme ajrore.
Sipas El Mundo, alarmi i ngritur nga CIA është dëgjuar dhe është marrë shumë seriozisht nga presidenti Francez Emmanuel Macron. Më 16 shtator, kreu Elize mblodhi Këshillin e Mbrojtjes. Dy ditë më vonë, ai thirri udhëheqësit e të gjitha partive dhe kandidatët për zgjedhjet presidenciale të vitit 2027.
Një ditë pas takimit politik të thirrur nga Macron, disa harta të Mesdheut u shfaqën në kanalet Telegram më afër Kremlinit, duke treguar objektiva të mundshme për sulmet ruse: ” Ilaçi kundër arrogancës franceze “.
Mediat evropiane lidhin alarmin edhe me shqetësimet në rritje për luftën hibride ruse, e cila përfshin sabotime, sulme kibernetike dhe incidente me dronë në vende të NATO-s gjatë muajve të fundit.
